ದೀಪಾವಳಿ...

ಬೆಳಗಿಸು ಬೆಳಕಿನ ಕಿಡಿಯೊಂದನು ಬದುಕೇ 

ಮನಸನು ಬೆಳಗುವ ಬೆಳಕನು,

ಕತ್ತಲೆಯ ಕರಗಿಸುವ ಬೆಳಕನು 

ಲೋಕಕೆ ದೀಪವಾಗುವ ಬೆಳಕನು...

ಬೆಳಗಿಸು ಮನದಲಿ ಏಕಾಗ್ರತೆಯೆಂಬ ಬೆಳಕನು

ಜ್ಞಾನದ ದೀಪವ ಬೆಳಗುವ ಬೆಳಕನು,

ಕೋಟಿ ಕನಸುಗಳ ಹುಟ್ಟಿಸೋ ಬೆಳಕನು

ಬದುಕಲಿ ನಗುವ ಹರಸುವ ಬೆಳಕನು...

ಬೆಳಗಿಸು ಕರ್ಮದ ಬೆಳಕನು ಬದುಕೇ

ಪುಣ್ಯದಂತೆ ಹಿಂಬಾಲಿಸೋ ಬೆಳಕಿನ ಕಿಡಿಯನು,

ಕತ್ತಲೆಯೊಳು ಮಿಂಚಂತೆ ಮಿನುಗೋ ಬೆಳಕನು

ಧರ್ಮವ ಧರಿಸುವ ಬೆಳಕನು...

ಬದುಕೇ ಬೆಳಗಿಸು ಭಕ್ತಿಯೆಂಬ ಕಿಡಿಯನು 

ಮನವ ಮಂದಿರವಾಗಿಸುವ ಬೆಳಕನು,

ಹರಸು ಕೋಟಿ ತಾರೆಗಳ ಬೆಳಕನು

ಆತ್ಮವೇ ಪರಮಾತ್ಮನಾಗುವ ಬೆಳಕನು...

ನೆನಪೇ ನೆಪವೂ...

ನೆನಪುಗಳ ಮೆರವಣಿಗೆಯೊಳಗೆ 

ಬದುಕಿಲ್ಲಿ ಒಂಟಿ ಹಕ್ಕಿಯ ಹಾಗೆ,

ವಿರಹವಾದರೂ ಸರಿ ನೋವಾದರೂ ಸರಿಯೇ 

ಕೇಳುವುದಕೇ ಬರೀಯ ಚಿಲಿಪಿಲಿಯು ಅಷ್ಟೇ...

ಮರೆತೆನೆಂದರೂ ಮರೆಯಲಾಗದು ಇಲ್ಲಿ 

ನೆನಪುಗಳ ಒಡನಾಟವು ಹೀಗೆ,

ದೂರ ದೂರ ಮನಸು ತುಂಬಾ 

ಒಂಟಿತನದ ಭಾರವ ಹೊತ್ತು...

ಕಂಗಳಲಿ ಸಾವಿರ ಕನಸುಗಳ ತುಂಬಿ 

ಎದೆಯೊಳಗೆ ನೂರು ಅಳುಕನು ಮುಚ್ಚಿ,

ಅವಮಾನಗಳ ಮೆಟ್ಟಿ ನಡೆದು

ಬದುಕು ನಗಲು ಪಡಬೇಕಿದೆ ಪಾಡು...

ಕಳೆದುಕೊಂಡ ಒಂದು ಗಳಿಗೆ

ಬದುಕನು ಹಿಂಡುವ ಪ್ರತಿ ಕ್ಷಣವೂ ಇಲ್ಲಿ,

ಖುಷಿಕೊಡದ ಪಯಣವು ಇದು

ನಿತ್ಯ ನಿರಂತರ ಮುಗಿಯದಂತೆ...