ಇರುಳೊಳಗೆ ನೋವ ನುಂಗಬೇಕು
ಹಗಲಲ್ಲಿ ಖುಷಿಯ ಮೆರೆಸಬೇಕು
ನೋಡುಗರಿಗೆಂದೂ ನಾ ಹಸನ್ಮುಖಿಯಾಗಿರಬೇಕು.
ಅಳಬೇಕು ನಾನು ಮಳೆಯೊಳಗೆ
ನಗಬೇಕು ಬಿಸಿಲ ಬೇಗೆಯೊಳಗೂ
ಅತ್ತು ನಕ್ಕು ಮನವ ಹಗುರಾಗಿಸಬೇಕು.
ಯೋಚನೆಗಳ ಭಾರ ಮರೆಸಬೇಕು
ಮಾತಿನಲೇ ನಾನು ಮೂರು ಹೊತ್ತು
ಒಂಟಿಯೆನ್ನುವ ಭಾವ ಬಂಧಿಸಲಾರದಂತೆ.
ಕಾಡುವ ನೆನಪುಗಳ ಬಚ್ಚಿಡಬೇಕು
ಕನಸುಗಳು ಕೂಡಾ ಹುಡುಕದಂತೆ
ನಿದಿರೆಯಲಿ ನಾನು ಸುಖಿಯಾಗಿರಬೇಕು.
ನನ್ನದೆಲ್ಲಾ ಭಾವಗಳ ಹಂಚಬೇಕು
ನಾಳೆಗಳು ಎಂದೂ ಬರಿದಾಗದಂತೆ
ಒಂದಷ್ಟು ಹೃದಯಗಳು ನನ್ನ ನೆನೆಯುವಂತೆ.
ನಗಬೇಕು ನಾನು ನಗಿಸಬೇಕು
ಹಿಡಿ ಪ್ರೀತಿಯನ್ನು ಪಡೆಯಬೇಕು
ನಾಳೆಗಳು ಕೂಡಾ ಸುಂದರವಾಗಿರುವಂತೆ.
