ಹಚ್ಚುವೆನು ನಾನಿಂದು ದೀಪಗಳ ಸಾಲು
ಮನದ ಕತ್ತಲೆಯ ಕರಗಿಸು ಓ ಗುರುವೇ,
ಬದುಕೆಂಬ ಬಂಡಿಗೆ ಸಾರಥಿಯು ನೀನೇ
ನಡೆಸು ಬಾ ನೀನೆನ್ನ ಬೆಳಕ ಕಡೆಗೆ.
ಮನದಿ ತುಂಬಿಹ ಅಂಧಕಾರವ ಅಳಿಸು
ಜ್ಞಾನದ ಸುಧೆಯನ್ನು ನೀನು ಹರಿಸು,
ಬೇಡುವೆನು ನಾನಿನ್ನ ಬದುಕ ಬೆಳಗಲು
ಕರುಣಾಳು ನೀನೆನ್ನ ಕೈ ಹಿಡಿಯು ಗುರುವೇ.
ಜಗದ ಕತ್ತಲೆಯ ಕಳೆಯೋ ಜ್ಯೋತಿಯು ನೀನು
ನಿನಗಾಗಿ ಹಚ್ಚಿಹೆನು ಹಣತೆಯೊಂದ ನಾನು,
ಜ್ಯೋತಿಯಾಗೆನ್ನ ಮನವನ್ನು ಬೆಳಗು
ದಾರಿಯೊಂದನು ತೋರಿ ಉಪಕರಿಸು ಗುರುವೇ.
ಭರವಸೆಯ ಕಿರಣವೊಂದ ನೀ ತೋರು ನನಗೆ
ನುಗ್ಗಿ ನಡೆವೆ ನಾನು ನೀ ತೋರಿದಂತೆ,
ಎದ್ದು ನಿಲ್ಲುವ ಛಲವ ಅನುಗ್ರಹಿಸು ನೀನು
ಮನದ ಭಯವನ್ನು ಪರಿಹರಿಸು ಗುರುವೇ.
ಜಗದ ಗುರುವೇ ಪಾಲಿಸು ನೀನೆನ್ನ
ಕರ್ಮಫಲಗಳ ಅನುಭವಿಸೋ ಶಕ್ತಿಯನು ನೀಡು,
ಕರಗಿಹೆನು ದಿನವೂ ಅಂಧಕಾರದಲಿ
ಶ್ರೀಗುರುವೇ ಕರುಣಿಸು ಬದುಕಿಗೆ ಬೆಳಕನ್ನು.
