ಹಾಡು ಪಾಡು...

ಬದುಕಿನ ಈ ಯಾತ್ರೆಯಲಿ
ಪ್ರೀತಿಯ ಪುಟ್ಟ ಊರೊಳಗೆ,
ಕನಸಿನ ಬುತ್ತಿಯ ಕಟ್ಟಿಕೊಂಡ
ಅಲೆಮಾರಿಯ ಹಾಡುಪಾಡು ನನ್ನದು...

ನೆತ್ತಿಯ ಸುಡುತಿದೆ ನೆನಪಿನ ಕಿರಣಗಳು
ಆದರೂ ಹೃದಯದಿ ಬೀಸಿದೆ ತಂಗಾಳಿ,
ಪ್ರೀತಿಯ ಈ ಕನವರಿಕೆ
ಮರೆಸಿದೆ ಸವೆಸಿದ ದಾರಿಯ ಚಡಪಡಿಕೆ...


ಯಾವುದೋ ಊರು ಎಲ್ಲಿಗೋ ಪಯಣ
ಮನಸು ಮಾತ್ರ ಜೊತೆಗಿಲ್ಲಾ,
ಪ್ರೀತಿಯ ಗುಡಿಯಾ ಹುಡುಕುತ್ತಾ
ಹೊರಟಿಹ ಮನಸಿಗೂ ಪರಿಧಿಯ ಹಂಗಿಲ್ಲಾ...

ಕನಸಿನ ಬುತ್ತಿಯ ತುಂಬಾ ಹೊಸ ರುಚಿಯಿರಲು
ಮರೆತಿದೆ ಮನವು ಹಸಿವಿನ ಹಾಡು,
ಪ್ರೀತಿಯ ಕನಸಲಿ ಮನ ತೇಲಿರಲು
ಬದುಕಿನ ಪಾಡದು ಹಾಡಾಗಿದೆ...

ಕನವರಿಕೆ...

ಬದುಕು ಇಲ್ಲಿ ಭರವಸೆಯೂ
ನಾಳೆಯಾ ಕನಸಿಗೆ,
ಕನಸಿಲ್ಲಿ ತೋರಣವೂ
ನಾಳೆಗಳ ಪಯಣಕ್ಕೆ...

ನೆನಪುಗಳೆಲ್ಲಾ ಹಾಡಾಗಿ
ಗುನುಗುತಿವೆ ಸಂಗೀತ,
ಇಂದು ನಿನ್ನೆಗಳ ದಣಿವಿಲ್ಲಿ
ನಾಳೆಯಾ ಪಯಣಕ್ಕೆ ಅಡ್ಡಿಯಾಗದಿರಲೆಂದು...

ಕನವರಿಸು ಓ ಬದುಕೇ
ಪ್ರೀತಿಯನು ಎಂದೂ,
ನಡೆಯುತಿರಲಿ ಈ ಪಯಣ
ನಾಳೆಯಾ ನಾಳೆಗಳಲಿ ನಿತ್ಯ ನಿರಂತರ...

ಹರಸು ನೀನಿಲ್ಲಿ ಓ ಬದುಕೇ
ಭರವಸೆಯಾ ಕಿರಣಗಳ,
ಏಳು ಬೀಳುಗಳ ಕೋಟೆಯ ದಾಟಿ
ಮುನ್ನಡೆಯಬೇಕಿದೆ ಜಗದಲ್ಲಿ...