ಈ ಬದುಕಿನ ಪಯಣದ ತುಂಬೆಲ್ಲಾ
ನೂರಾರು ತಿರುವು ಇದೆಯಲ್ಲಾ,
ನಗುನಗುತಾ ಸಾಗುತ ಇರುವಾಗ
ನಿಲ್ದಾಣವೇ ಮರೆತಂತಿದೆಯಲ್ಲಾ...
ಹೊಸತೊಂದು ಲೋಕವೇ ತೆರೆದಂತೆ
ಬದುಕು ಅಚ್ಚರಿಯ ಕಂಡಂತೆ,
ಆಸೆಗಳ ಜೊತೆಗಿನ ಈ ಪಯಣ
ಸಾಗುವ ದಾರಿಯ ಮರೆಸಿದೆಯಲ್ಲ...
ಮನಸಿನ ಹಾಳೆಗಳ ತುಂಬೆಲ್ಲಾ
ಭಾವಗಳ ಚಿತ್ತಾರ ಬರೆದಂತೆ,
ಕನಸುಗಳ ಹೊತ್ತ ಕಂಗಳಿಗೂ
ಬದುಕು ತೋರಣ ಕಟ್ಟಿದೆಯಲ್ಲ...
ಕಾಲವು ಮಗ್ಗುಲು ಬದಲಿಸಿದಂತೆಲ್ಲ
ಹೊಸತೊಂದು ಪರೀಕ್ಷೆಯು ಇದೆಯಲ್ಲ,
ಹೊಸತಾದ ನಿರೀಕ್ಷೆಯ ಜೊತೆಯಿಲ್ಲಿ
ನಗುವಿನ ಮೆರವಣಿಗೆ ನಡೆದಿದೆಯಲ್ಲ...
