ಮನವೆಂಬ ಮಲ್ಲಿಗೆ...

ಅರಳುತಿರು ಮುಗ್ಧ ಮನವೇ 

ನಗುತಲಿರು ಮುದ್ದು ಮನವೇ,

ಲೋಕವೆಂದಿಗೂ ನಗುವುದು ಹಿಂದೆ 

ಸಾಗುತಿರು ನೀ ಎಂದೂ ಮುಂದೆ...

ಅಳುವಿಲ್ಲದ ಜೀವವೂ ಇಲ್ಲ 

ಅಳುಕಿಲ್ಲದ ಭಾವವೂ ಇಲ್ಲ,

ಮರುಗದಿರು ನೀನು ಸುಮ್ಮನೆ 

ಸಾಗುತಲಿರಲಿ ನಿನ್ನಯ ಪಯಣ...

ಸಾಗುವುದು ಕಾಲದ ನಿಯಮ 

ಹೆಜ್ಜೆ ಹಾಕುವುದು ಬಾಳಿನ ನಿಯಮ,

ನಗುವಿರಲಿ ಅಳುವಿರಲಿ ಮನಸೇ 

ಸಾಗುತಿರು ಕನಸುಗಳ ಜೊತೆಗೆ...

ಬದುಕು ಇಲ್ಲಿ ಒಂಟಿ ಪಯಣ 

ಹುಟ್ಟಿನಿಂದ ಬಿಟ್ಟುಹೋಗುವವರೆಗೂ,

ಸಿಕ್ಕವರೆಲ್ಲ ನಮ್ಮವರೇ ಅಲ್ಲಾ 

ನಮ್ಮಂತೆ ಅವರೂ ಒಂಟಿಗಳೇ ಎಲ್ಲಾ...

ದೂರ ತೀರ...

ದೂರ ತೀರದ ಸಾಗರ 

ಕಣ್ಣೆದುರು ಹರಡಿದೆ ಅಲೆಗಳ,

ಬದುಕು ಇಲ್ಲಿ ಭವ ಸಾಗರ 

ದಾಟಲಾಗದು ಹಾಗೆ ಸುಮ್ಮನೆ...

ಅನಂತವಿಲ್ಲಿ ಆಗಸ 

ನಿತ್ಯ ಹೊಳೆಯುವ ಚುಕ್ಕಿ ಚಂದಿರ,

ಮನಸು ಅಂತ್ಯವಿಲ್ಲದ ಮಂದಿರ 

ನೂರು,ಸಾವಿರ ಕನಸಿನ ಚಪ್ಪರ...

ಬಿರುಸಾಗಿ ಬೀಸೊ ಮಾರುತ 

ಹೊತ್ತು ತರುವುದು ಮಳೆಯನು,

ಕಾಲಚಕ್ರದ ಬಿರುಗಾಳಿಯು

ಹೊತ್ತು ಬರುವುದು ಕಣ್ಣ ಹನಿಗಳ...

ನಾಳೆಗಳೆಂಬ ಭರವಸೆಗಳೊಳಗೂ

ಇದ್ದಂತೆ ಇರಬೇಕು ಸುಮ್ಮನೆ,

ಭಾರವಾದ ಕನಸುಗಳ 

ಬದುಕಲ್ಲಿ ಹೊರುವುದ ಬಿಡಬೇಕು...