ನೆನಪು...

ಖಾಲಿ ಖಾಲಿ ಮನಸೊಳಗೂ
ಪೋಲಿ ಪೋಲಿ ಕನಸುಗಳು,
ಕಣ್ಣ ಮುಚ್ಚಲು ಬಿಡದಂತೆ
ಕಾಡಿ ಓಡಿ ಹೋಗುತಿವೆ...

ಬರಿ ರಾತ್ರಿಯಲ್ಲ ಹಗಲೊಳಗೂ
ಗೆಜ್ಜೆ ಕಟ್ಟಿ ಕುಣಿಯುತಿವೆ,
ಧ್ಯಾನವೀಗ ಮರೆತೋಯ್ತು
ಮನಸಿನ ಮಾತು ಕೂಡ ನಿಂತೋಯ್ತು...

ಓಡಿ ಹೋಗೊ ಕಾಲಕ್ಕೂ
ಕರುಣೆಯೆ ಇಲ್ಲಿ ಕರಗೋಯ್ತು,
ಕೂಗಿ ಕರೆದರೂ ಇಲ್ಲೀಗ
ಕಾಡುವ ನೆನಪುಗಳನ್ಯಾರೂ ತಡೆಯೋರಿಲ್ಲಾ...

ಪ್ರೀತಿಯ ಕೇಳಲು ನಾ ಬಂದೆ
ವಿರಹದ ಉರಿಯಾ ನೀ ಕೊಟ್ಟೆ,
ಕಾಡುವ ಓ ನೆನಪುಗಳೇ
ನಿಮಗೆ ರಜೆಯೂ ಕೂಡ ಇಲ್ಲಿಲ್ವೇ?...

ನಮೋ ತಾಯಿ ಭಾರತಿ...

ತನು ಕನ್ನಡ ಮನ ಕನ್ನಡ
ರಕ್ತದ ಕಣ ಕಣವು ಕನ್ನಡ,
ದೇಹದೊಳಗಣ ಉಸಿರು ಮಾತ್ರ
ತಾಯಿ ಭಾರತಿ ನಿನಗರ್ಪಿತ...

ತಾಯಿ ನೀನು ದೈವವಾದೆ
ಓ ಪ್ರೀತಿಯ ಭಾರತಿ,
ನಿನ್ನ ಮಡಿಲಲ್ಲಿ ಜ್ಯೋತಿಯಾಗಿ
ನಿನಗೆ ಬೆಳಗುವೆನಮ್ಮ ಆರತಿ...

ಕೋಟಿ ದೇವರಿಲ್ಲಿ ಇದ್ದರೂನು
ನೀನವರಿಗಿಲ್ಲಿ ಮಾತೆಯೂ,
ದಿನದ ಮೊದಲ ನಮನ
ನಿನಗೆ ಓ ದೇವಿ ಭಾರತಿ...

ನಿತ್ಯ ನಡೆಯುವುದಿಲ್ಲಿ ಪೂಜೆ ನಿನಗೆ
ಮಂತ್ರವದುವೆ ವಂದೇಮಾತರಂ,
ಹಿಮದ ಗಿರಿಯು ಕಿರೀಟ ನಿನಗೆ
ನಮ್ಮ ಕಾಯಲದುವೆ ಕೋಟೆಯೂ...

ಗಂಗೆ ಯಮುನೆ ತುಂಗ ಭದ್ರೆ
ನಿನಗೆ ನಿತ್ಯ ಅಭಿಷೇಕವಗೈವರು,
ಮಲೀನವಾದ ಹೃದಯಗಳಲಿ
ದೇಶ ಭಕ್ತಿಯನ್ನು ತುಂಬಿಸಮ್ಮ ಭಾರತಿ...

ಅಪ್ಪಾ...

ಬದುಕು ಕಲಿಸಿದ ಕಲಾವಿದ
ಜೀವನದ ನಿಜವಾದ ನಾಯಕ,
ಬದುಕಲಿ ಪಡೆದ ಮೊದಲ ಸ್ನೇಹಿತ
ನನ್ನ ಕನಸುಗಳ ಚೌಕಿದಾರ...

ಪ್ರೀತಿಲಿ ನೀನು ಹೃದಯವಂತ
ತಪ್ಪಿಗೆ ನೀನೇ ದಂಡನಾಯಕ,
ನೋವಲ್ಲೂ ನಗುವ ಧೀಮಂತ
ಕಣ್ಣೀರನೂ ಕರಗಿಸೋ ಜಾದುಗಾರ...

ಸ್ವಾರ್ಥವ ಮರೆತ ಗುಣವಂತ
ಸ್ವಾಭಿಮಾನವ ಮೆರೆವ ಶ್ರೀಮಂತ,
ನ್ಯಾಯಕ್ಕೆ ನೀನೇ ಅರಕ್ಷಕ
ಅಗಣಿತ ಗುಣಗಳ ಸಾಗರ...

ನೀನು ಸೃಷ್ಟಿಯ ಸುಂದರ ಕೌತುಕ
ನೀನು ಆ ದೇವರಾ ಮಗ,
ಸವೆಸುವೆ ಜೀವವ ಸಂಬಂಧಗಳಿಗಾಗೆ
ಆದರೂ ನೀನು ಶಾಪಗ್ರಸ್ಥ ಗಂಧರ್ವ...

ಆತ್ಮ ಬಂಧ...

ಜೊತೆಗೆ ಇರುವವರೆಗೆ ನೀನು
ಕಾರಣ ಕೇಳಲಿಲ್ಲಾ ನಾನು,
ಬಿಟ್ಟು ಹೋಗುವ ಮುಂಚೆ
ಕಾರಣ ಕೇಳೆನು ನಾನು...

ಇಂದಲ್ಲಾ ನಾಳೆ ನೀನು
ಬಿಟ್ಟು ಹೋಗಲೇಬೇಕು ನನ್ನ,
ಕಾರಣ ತಿಳಿದಿದೆ ನನಗೆ
ಮತ್ತೆ ಹೇಗೆ ತಡೆಯಲಿ ನಿನ್ನಾ...

ಬೇಸರವು ನನಗಿಲ್ಲಾ
ನೀ ಬಿಟ್ಟು ಹೋಗುವೆಯೆಂದೂ,
ನಮ್ಮಿಬ್ಬರ ಅಗಲುವಿಕೆ
ಅನಿವಾರ್ಯ ಈ ಜೀವನಚಕ್ರದಲ್ಲಿ...

ಜೊತೆಗಿರುವವರೆಗೂ ನೀನಾದೆ ಉಸಿರು
ನಾನಾದೆ ನಿನಗಿಲ್ಲಿ ಹೆಸರು,
ನೀನಿಲ್ಲದ ಮೇಲೆ ಲೋಕವೇ ಬರಿದು
ನಾನಾಗುವೆ ಪಂಚಭೂತಗಳ ಶರಣು...