ಕರ್ಮ...

ಪಾಪ ಪುಣ್ಯಗಳ ಪಯಣ
ಮನುಜ ನಿನ್ನ ಬದುಕು,
ಕೋಟಿ ಜೀವ ಧಾತುಗಳ ದಾಟಿ
ಆತ್ಮ ತೊಟ್ಟ ಹೊಸ ಅಂಗಿಯಂತೆ...

ಇದು ಪಾಪ ಪುಣ್ಯಗಳ ಗಂಟು
ಇಲ್ಲುಂಟು ಜನ್ಮ ಜನ್ಮಗಳ ನಂಟು,
ಈ ಜಗವು ಕರ್ಮ ಭೂಮಿಯಾಗಿರಲು
ಮನುಜ ನಿನಗಿಲ್ಲಿಹುದು ಕರ್ಮಗಳ ನಂಟು...

ಪಾಪ ಪುಣ್ಯಗಳ ಎಣಿಕೆ
ನಡೆಯುವುದು ಅವನ ಬಳಿಯಂತೆ,
ಕರ್ಮ ಫಲಗಳ ಸಂತೆ
ನಡೆಯುವುದು ಇಲ್ಲೇ ಜಗದ ಮುಂದೆ...

ಸತ್ಕರ್ಮಗಳ ಮಾಡಬೇಕು ಇಲ್ಲಿ
ಬೆನ್ನು ಬಿಡದ ಬೇತಾಳವಿಲ್ಲಿ ಕರ್ಮಫಲವು,
ನಿನ್ನೆಗಳ ಕರ್ಮಗಳಲ್ಲಿ ನಾಳೆಯ ಬದುಕು
ಬಾಳಬೇಕು ಇಲ್ಲಿ ಕರ್ಮಫಲಗಳ ಜೊತೆಗೆ...

ಕಲೆ...

ವಿಧಿಯು ಗೀಚಿದ ರೇಖೆಗಳ

ಕಲೆಯಾಗಿಸಬೇಕಿದೆ ಬದುಕಲಿ,

ನಮ್ಮದೇ ಬಣ್ಣಗಳ ಬಳಿದು

ಪ್ರಯತ್ನವೆಂಬ ಕುಂಚದಲಿ...

ಕಣ್ಣಿಗೆ ಕಾಣದ ರೇಖೆಗಳ

ಜೋಡಿಸಬೇಕಿದೆ ನಾಜೂಕಿನಲಿ,

ಸುಂದರ ಚಿತ್ರವೊಂದು ಬರಬೇಕಿದೆ

ರೇಖೆಗಳ ಜೊತೆಗಿನ ಆಟದಲಿ...

ಸೋಲು ಗೆಲುವಿನ ಮೆಟ್ಟಿಲುಗಳ

ಬರೆಯಬೇಕಿದೆ ನಾವಿಲ್ಲಿ,

ಕಾಣದ ನಾಳೆಗಳ ಬಯಲೊಳಗೆ

ಬಿತ್ತಬೇಕಿದೆ ಕರ್ಮದ ಬೀಜಗಳ...

ಮಾನ ಸಮ್ಮಾನಗಳ ಪತ್ರಗಳ

ತಯಾರಿಸಬೇಕಿದೆ ನಾವುಗಳೇ,

ಜಗವು ಕೊಡುವ ಬಿರುದುಗಳ

ಚಿತ್ರಿಸಲಾಗದು ಬದುಕಿನ ಪಟದೊಳಗೆ...

ಬದುಕಿನ ಕಲೆಯ ಅರಿತಾಗ

ಸುಂದರವದು ಕಾಣದ ರೇಖೆಗಳು,

ಕಾಣದ ಕಡಲಿಗೆ ಮನ ಹಂಬಲಿಸೇ

ಬದುಕಿನ ಪಟವದು ನೀಲ ಸಾಗರ...