ತಪಸ್ಸು...

ದಿನ ಮುಗಿಯೋ ಹೊತ್ತಿಗೆ

ಕಾಡುವವು ಕನಸುಗಳು ಮೆತ್ತಗೆ,

ಮನಸಿಲ್ಲಿ ನೆನಪುಗಳ ಕೊಟ್ಟಿಗೆ

ಬದುಕೀಗ ಮೌನಕೆ ಕರೆಕೊಟ್ಟಿದೆ...

ಕಾಲವು ಪ್ರಶ್ನೆಗಳ ಮುಂದೆ ಇಟ್ಟಿದೆ

ಬದುಕಿಲ್ಲಿ ಉತ್ತರವ ಹುಡುಕಿದೆ,

ಸಂಶಯಗಳು ಇಲ್ಲಿ ಬೆಟ್ಟದಷ್ಟಿವೆ

ಮನಸಿಗೆ ಈಗ ಅಗ್ನಿಪರೀಕ್ಷೆ ಎದುರಾಗಿದೆ...

ಅಗ್ನಿಯ ಗುಣವದುವೆ ಸುಡುವುದು

ತನ್ನೆದುರು ಬಂದ ವಸ್ತುಗಳ ನುಂಗುತಾ,

ಮನದೊಳಗಿನ ಅಗ್ನಿಯದು ಸುಡುವುದು

ಮನಸಿನ ಜೊತೆಯಲಿ ಬದುಕನು...

ನೆನಪುಗಳು ಗೀರಿದ ಬೆಂಕಿಗೆ

ಬದುಕು ಆಗಲೇಬಾರದು ಯಜ್ಞಶಾಲೆ,

ಅರ್ಪಿಸಲು ಹವಿಸ್ಸಲ್ಲ ಮನಸ್ಸು

ಬದುಕಿಲ್ಲಿ ಬರೀಯ ಒಂದು ತಪಸ್ಸು... 

ಆಯ್ಕೆ...

ಹುಟ್ಟು ನಮ್ಮಯ ಆಯ್ಕೆಯಲ್ಲ
ಬದುಕುವ ರೀತಿಯಿಲ್ಲಿ ಆಯ್ಕೆಯಷ್ಟೇ,
ಒಲವೇ ನೀನು ಮನಸಿನ ಆಯ್ಕೆ
ಜೊತೆಗಿರುವ ಸಮಯ ಕಾಲದ ನಿರ್ಧಾರವಷ್ಟೇ...

ಜೀವಕ್ಕೆ ಇಲ್ಲಿ ಹೆಸರಿದೆಯಷ್ಟೇ
ಬದುಕಿಗೆ ಇಲ್ಲಿ ಹೆಸರಿಲ್ಲಾ,
ಭಾವನೆಗಳಿಗೆ ಹೆಸರಿದೆಯಷ್ಟೇ
ಕನಸಿಗೆ ಇಲ್ಲಿ ಹೆಸರಿಲ್ಲಾ...

ಆಸೆಗಳಿಗೆ ಇಲ್ಲಿ ಆಯ್ಕೆಗಳಿಲ್ಲಾ
ಆಯ್ಕೆಗಳಿರುವುದು ಅವಕಾಶಗಳಲ್ಲಿ,
ಸಾಧನೆಗೆ ಹೆಸರಿದೆಯಿಲ್ಲಿ
ಶ್ರಮಕ್ಕೆ ಯಾವುದೇ ಹೆಸರಿಲ್ಲಾ....

ಬದುಕು ಇಲ್ಲಿ ನೀಲಿ ನೀಲಿ
ಆಯ್ಕೆಗಳ ಆಟದೊಳು,
ತೀರ ಕಾಣದ ಸಾಗರದಂತೆ
ಬದುಕು ಅದಮ್ಯ ಅವಕಾಶ...