ಮರುಳು ಮನಸು...

ಮರೆವಿನ ಮರೆಯಲ್ಲಿ

ಪ್ರೀತಿಯು ಇಹುದಿಲ್ಲಿ,

ಅರಿವಿನ ನೆರಳೊಳಗೆ

ಬದುಕಲಿ ಖುಷಿಯೂ ಇಹುದಿಲ್ಲಿ...

ತಾಳ್ಮೆಯ ಹಾದಿಯಲಿ

ಮನಸು ಅರಳಿಹುದು,

ನೋವಿನ ಅಗ್ನಿಯಲಿ

ಬದುಕು ಹದವಾಗಿಹುದು...

ಶಾಂತಿಯು ಜೊತೆಯಿರಲು

ಆತ್ಮವೂ ನಗುತಿಹುದಿಲ್ಲಿ,

ಸತ್ಯದ ಹಾದಿಯಲಿ

ನಾಳೆಗಳ ಬೆಳಕಿಹುದು...

ಸಹನೆಯ ಕಟ್ಟೆಯೊಳು

ತುಂಬಿದೆ ಪ್ರೀತಿಯ ಪನ್ನೀರು,

ನ್ಯಾಯ ಅನ್ಯಾಯಗಳ ತಕ್ಕಡಿಲಿ

ಬದುಕು ತೂಗಿಹುದು...

ಮೌನಮುಖಿ...

ಪ್ರೀತಿಸು ಮನಸೇ

ಬದುಕು ಪರಿತಪಿಸದಂತೆ,

ಬಾಳು ಓ ಜೀವವೇ

ಪಶ್ಚಾತಾಪವೂ ಇಲ್ಲದಂತೆ...

ನಡೆಯೋ ಕಾಲುಗಳೇ

ಎಡವೋದು ಇಲ್ಲಿ,

ನಗುವಾ ಮಂದಿಯ ನೋಡಿ

ಅಳಬೇಕು ಯಾಕೆ...

ನಗುವಿಗೂ ಅಳುವಿಗೂ

ಹೆಚ್ಚೇನೂ ಅಂತರವಿಲ್ಲ,

ಕಣ್ಣೀರು ಸುರಿಸೋದು ಕಣ್ಣಾದರೂ

ಮರುಗೋದು ಮಾತ್ರ ಮನಸಲ್ಲವೇ...

ಮೂರು ದಿನದ ಪಯಣ

ಕೋಪ ತಾಪವೇಕೆ,

ನಗುನಗುತಾ ಬಾಳಬೇಕು

ಬದುಕು ಬವಣೆಯಾಗದಂತೆ...