ಭರವಸೆಯೇ ಬೆಳಕು...

ಬದುಕು ನಡೆಯೋ ಬಯಲಲ್ಲಿ

ಬಲು ಕತ್ತಲ ದಾರಿ ಇದೆಯಿಲ್ಲಿ,

ಹೆಜ್ಜೆ ಹೆಜ್ಜೆಯೂ ಪರೀಕ್ಷೆಯಂತಿರಲು

ಭರವಸೆಯೇ ದಾರಿ ದೀಪವೂ...

ನೂರಾರು ನೋವು ಇಹುದಿಲ್ಲಿ

ಸಾವಿರ ಕನಸಿಗೆ ಸವಾಲಾಗಿ,

ನಗುವನು ಮರೆಸಿ ಬಿಡುವಂತ

ಕ್ಷಣಗಳು ಸಾವಿರ ಇಹುದಿಲ್ಲಿ...

ಯಾವುದೋ ಜನ್ಮದ ಋಣವಿಲ್ಲಿ 

ಬದುಕನು ಆವರಿಸಿರುವಂತೆ,

ಯಾವುದೋ ಕರ್ಮದ ಫಲದಂತೆ

ಜೀವಕೆ ರೋಧನೆ ತಪ್ಪದಿಲ್ಲಿ...

ಕನಸುಗಳು ಮರೆತರೂ ಬದುಕಲ್ಲಿ

ಭರವಸೆಯೂ ಬತ್ತದಿರಲಿ ನಾಳೆಗೆ,

ನಗುವುದ ಮರೆತರೂ ಬಾಳಲ್ಲಿ

ಸೋಲನು ತಬ್ಬದಿರಲಿ ಮನಸಿಲ್ಲಿ...

ಬದುಕಿನ ಕಥೆ...

ಅರಳಿ ನಗುವಾ ಹೂವುಗಳಿಲ್ಲಿ

ಜೀವನ ಪ್ರೀತಿಯ ತೋರಿಸಿವೆ,

ಬಾಡಿ ಹೋದ ಮೊಗ್ಗುಗಳಿಲ್ಲಿ

ಬದುಕಿನ ಬವಣೆಯ ಸೂಸುತಿವೆ...

ಉದುರಿ ಬೀಳುವ ಎಲೆಗಳಿಲ್ಲಿ

ಜೀವನ ಸತ್ಯವ ಬೋಧಿಸಿವೆ,

ಸುಯ್ಯನೆ ಬೀಸುವ ಗಾಳಿಯು ಕೂಡ

ತಾಳ್ಮೆಯ ಪಾಠವ ಹೇಳುತಿದೆ...

ಸಾಗರ ಸೇರೋ ನೀರದು ಕೂಡ

ತನ್ನಿರುವಿನ ಮಹಿಮೆಯ ಸಾರುತಿದೆ,

ಮುಗಿಲೆತ್ತರ ಚಾಚಿದ ಗಿರಿಶಿಖರಗಳಿಲ್ಲಿ

ಸ್ವಾಭಿಮಾನದ ಕತೆಯ ಹೇಳುತಿವೆ...

ಕೈಗೆ ಎಟುಕದ ಅನಂತ ಆಗಸ ಕೂಡ

ಅವಕಾಶಗಳ ಅರಿವನು ನೀಡುತಿದೆ,

ಸುರಸುಂದರಿಯಂತ ಪ್ರಕೃತಿಯೀಗ

ಸೃಷ್ಠಿಯಲಿ ಬದುಕಿನ ಕತೆಯಾ ಹೇಳುತಿದೆ...