ಬದುಕ ಬನದಲಿ...

ಅಜ್ಞಾನದ ಮೋಡವು ಕವಿದಿರೆ

ಬದುಕಿನಾ ಬಯಲೊಳು,

ಮನಸಿನ ಮನೆಯೊಳು

ಅಂಧಕಾರವೇ ನಿತ್ಯವೂ...

ಅಪನಂಬಿಕೆಯ ಬಿರುಗಾಳಿ ಜೋರಾಗಿರಲು

ಬದುಕಿಲ್ಲಿ ಕತ್ತಲೆಯು ಮನುಜಾ,

ಪ್ರೀತಿಯಾ ದೀಪವಿಲ್ಲಿ ಬೆಳಗದು

ನಂಬಿಕೆಯಾ ಗೋಡೆಯೂ ಇಲ್ಲದೇ...

ಕಷ್ಟಗಳ ಬಿರುಬಿಸಿಲು ಸುಡುವುದು

ಆಸೆಗಳ ಬೆಟ್ಟವೂ ಕರಗೋವರೆಗೂ,

ಕಣ್ಣೀರು ಮಳೆಯಂತೆ ಸುರಿಯುವುದು

ಕರ್ಮದ ಮಣ್ಣಿಲ್ಲಿ ತಣಿಯುವವರೆಗೂ...

ಭರವಸೆಯ ಬಂಡೆಯನೇರಬೇಕು

ಬದುಕ ಪ್ರವಾಹದ ಸುಳಿಗಳ ನಡುವೆ,

ಮಾಗಬೇಕು ಬದುಕು ಜಗದಿ

ಕಾಲದ ನಿರಂತರ ಪಯಣದೀ... 

ನೆನಪೇ...

ನೀನು ಕಾಲದ ಕವಿತೆ

ಬದುಕಲಿ ಮರೆಯದೇ ಉಳಿದೆ,

ನೀನು ಕನಸಿನ ಕವಿತೆ

ಮನಸಲಿ ಅಳಿಯದೆ ಕುಳಿತೆ...

ಮೌನದ ಮಾತಾಗಿ ಕಲೆತೆ

ಭಾವದ ಸೊಗಡಾಗಿ ಕುಳಿತೆ,

ತುಟಿಯಂಚಲಿ ನಗುವಾಗಿ ಬೆರೆತೆ

ಕಣ್ಣಂಚಲಿ ಕನಸಾಗಿ ನಿಂತೆ...

ಸ್ನೇಹದ ಸೆಲೆಯಾಗಿ ಬೆಳೆದೆ

ಪ್ರೀತಿಯ ಗುರುವಾಗಿ ಮೆರೆದೆ,

ಭರವಸೆಯ ಬೆಳಕಾಗಿ ಹರಿದೆ

ಪರಿಧಿಗಳ ಗೆರೆಯನೇ ಮರೆತೆ...

ನೆನಪೇ ನೀನೊಂದು ಸುಂದರ ಕವಿತೆ

ಸ್ಮೃತಿ ನೀನು ನಾನೆಂಬ ಮೋಹಕೆ,

ನೀನಿಲ್ಲದ ಬದುಕೊಂದು ಬದುಕೇ

ನೀನೆಂದರೆ ಅದು ಬದುಕಿಗೆ ಹೊದಿಕೆ...