ಬೆಳಗು...

ಇರುವ ಜಗದೊಳಗೆ ಹರಿವ ತೊರೆಯಂತೆ 

ಮೂರು ದಿನದ ಬದುಕು,

ಒಂದು ಮುಂಜಾವು ಮತ್ತೆ ಮುಸ್ಸಂಜೆ 

ಬದುಕ ಹಾದಿಯೊಳಗೆ...

ಬಾಲ್ಯದೊಳು ತುಂಟಾಟ 

ಹರೆಯದೊಳು ಕಣ್ಣಮುಚ್ಚಾಲೆಯಾಟ,

ನಡುವೆ ನೋವು ನಲಿವುಗಳ ಕೂಟ 

ಮುಪ್ಪಿನೊಳು ಮತ್ತೆ ವೇದಾಂತ...

ಬಾಲ್ಯದಲಿ ಕನಸಿನೊಳು 

ಭಾವನೆಗಳೊಳಗೆ ಹರೆಯದಲಿ,

ಆಸೆಯೊಳು ಮುಪ್ಪಿನಲಿ 

ಬದುಕು ಸವೆದಿಹಿದು ಇಲ್ಲಿ ಕಾಣ...

ಬದುಕಿನ ಜಂಜಾಟಗಳ ನಡುವೆ 

ಮನಸು ಹುಡುಕಿದೆ ನೆಮ್ಮದಿಯ,

ಆಗೊಮ್ಮೆ ಈಗೊಮ್ಮೆ ಮತ್ತೆ ಹೊರಳಿ 

ಮನಸು ತುಳಿಯುತಿಹುದು ಸನ್ಯಾಸದ ಹಾದಿಯನ್ನೇ...

ಭಾವ ಶರಧಿ...

ಬದಲಾಗಿದೆ ಇಲ್ಲಿ ಬದಲಾಗಿದೆ 

ಕಾಲದ ಹರಿವಿನೊಳು ಬದಲಾಗಿದೆ,

ಮನಸಿಲ್ಲಿ ಪೂರಾ ಬದಲಾಗಿದೆ 

ಭಾವಗಳು ಎಲ್ಲಾ ಬದಲಾಗಿವೆ...

ಮರೆತುಹೋಗಿದೆ ಎಲ್ಲಾ ಮರೆತುಹೋಗಿದೆ 

ಜಗದ ಜಂಜಡದೊಳು ಎಲ್ಲಾ ಮರೆತುಹೋಗಿದೆ,

ಮರೆತುಹೋಗಿದೆ ಮನಸಿಲ್ಲಿ ಮರೆತುಹೋಗಿದೆ 

ತಪ್ಪನ್ನ ಕ್ಷಮಿಸೋದ  ಮರೆತುಹೋಗಿದೆ...

ಕಳೆದುಹೋಗಿದೆ ಇಲ್ಲಿ ಕಳೆದುಹೋಗಿದೆ 

ಲೋಕದಾ ಮಾಯೆಯೊಳು ಕಳೆದುಹೋಗಿದೆ,

ಮೋಹದಾ ಬಲೆಯೊಳಗೆ ಕಳೆದುಹೋಗಿದೆ 

ಎದೆಯೊಳಗೆ ಮನುಜತೆಯು ಕಳೆದುಹೋಗಿದೆ...

ಬದಲಾಗುತಾ ಎಲ್ಲಾ ಮರೆತಾಗಿದೆ 

ಮರೆತುಹೋಗಿ ಇಲ್ಲಿ ಕಳೆದಾಗಿದೆ,

ಬದುಕ ಕಲೆಯನ್ನು ಮರೆತಾಗಿದೆ 

ಮೌಲ್ಯಗಳೆಲ್ಲಾ ಇಲ್ಲಿ ಬರಿದಾಗಿದೆ...