ಅವಳಿಗೆ...

ನೀನು ಕನಸುಗಳ ಕಾಮನಬಿಲ್ಲು
ನನ್ನೆದೆಯಾ ಆಗಸದಿ,
ನಕಲು ಮಾಡಲು ಮರೆತೆ ನಾನೇ
ಈ ಒಲವ ಕುಂಚದಲಿ.

ಸ್ವಾತಿ ಮಳೆಯಾ ತುಂತುರು ನೀನು
ನನ್ನೊಲವಾ ಬಾಂದಳದಿ,
ಬೊಗಸೆ ತೆರೆದು ನಿಂತಿರುವೆ ನಾನು
ಪ್ರೀತಿ  ಮುತ್ತನು ಹಿಡಿಯೋಕೆ.

ಚಂದ್ರ ಚೆಲ್ಲಿದ ಬೆಳದಿಂಗಳು ನೀನು
ನನ್ನ ಬದುಕ ಪಯಣದಲಿ,
ಕಣ್ಮುಚ್ಚಿ ನಡೆಯುತಲಿರುವೆನು ನಾನು
ನೀ ಕರಗಿ ಹೋಗುವೆಯೆಂಬ ಭಯದಿಂದ.

ನನ್ನೊಲವಾ ಕಲರವ ನೀನು
ನನ್ನೊಳಗೆ ನದಿಯಾಗಿ ಹರಿಯುತಲಿರುವೆ,
ಭೋರ್ಗರೆವ ಸಾಗರವಾದೆ ನಾನು
ನಿನ್ನೊಲವ ಕಚಗುಳಿಗೆ.

ಇತಿಹಾಸ...

ಧರಣಿಯೊಳಗಿದೆ ನೂರಾರು ವ್ಯಥೆಯ ಕತೆಯೂ
ಕೆದಕಿ ನೋಡು ಇತಿಹಾಸವ,
ರಕುತ ಚೆಲ್ಲಿದ ನೂರು ಕತೆಯಾ
ದಾನವತೆಯು ಮೆರೆದ ದುರಂತ ವ್ಯಥೆಯಾ.

ಜಾತಿಗಾಗಿ ನಡೆಯಿತಿಲ್ಲಿ ಕಲಹ
ಪ್ರೀತಿ ಹೆಸರಲೂ ಹರಿಯಿತಿಲ್ಲಿ ರಕುತ,
ಅಮಾಯಕರ ರುಂಡವಿಲ್ಲಿ ಉರುಳಾಡಿತು
ಕೇಳು ನೀನು ಮನುಜತೆಯ ಮರೆತ ಕತೆಯಾ.

ಭೂಮಿಗಾಗಿ ನಡೆಯಿತಿಲ್ಲಿ ಘೋರ ಕಾಳಗ
ಸ್ವಾತಂತ್ರ್ಯದ ಹೆಸರಲ್ಲು ಭುವಿಯು ಕೆಂಪಾಯಿತು,
ಯುಗ ಯುಗಗಳು ಉರುಳಿ ನಿಂತವು
ಕೇಳು ನೀನು ಭೂಮಿ ಕಂಡ ವ್ಯಥೆಯ ಕತೆಯಾ.

ದ್ವೇಷಕಾಗಿ ಹೊತ್ತಿ ಉರಿಯಿತಿಲ್ಲಿ ಬದುಕು
ಮನದ ಬೆಂಕಿಗೆ ಭಸ್ಮವಾದವು ತಲೆಮಾರುಗಳು,
ತಲೆ ಕಾಯಲಿಲ್ಲ ಮನುಜತೆಯ ಪ್ರೀತಿ
ನೋಡು ಬಾ ನೀನು ಇತಿಹಾಸಗಳ ವ್ಯಥೆಯಾ.

ನಿತ್ಯವೂ ನಡೆಯುತಿದೆಯಿಲ್ಲಿ ಹೊಸ ಇತಿಹಾಸಕೆ ಮುನ್ನುಡಿ
ರಕ್ತವರ್ಣದ ಅಧ್ಯಾಯವು ಮತ್ತೆ ಮತ್ತೆ ತೆರೆಯುತಾ,
ಮಾನವತೆಯ ಮರೆತ ಮನಸುಗಳೇ ಇಲ್ಲಿ ಮೇಳೈಸುತ
ನೋಡು ಬಾ ನೀನು ಮನುಜ ಕುಲದ ಅಧಃಪತನದ ಕತೆಯಾ.

ಪ್ರೀತಿಯ ಚಿತ್ತಾರ...

ಬದುಕ ಬಯಲಲ್ಲಿ ಚೆಲ್ಲಿದೆ ಪ್ರೀತಿ ಬೆಳ್ಳಿಬೆಳದಿಂಗಳು
ಅರಳಿವೆ ಮನದ ಅಂಗಳದಿ ನೂರಾರು ಕನಸುಗಳು,
ಬಯಕೆ ನೂರಿಲ್ಲಿ ಮನಸಿಗೆ ಒಲವಾ ಪಯಣದಲಿ
ಭಾವಗಳ ಬಣ್ಣದಲಿ ಮನಸು ಹಾಕಿದೆ ರಂಗೊಲಿ.

ಬದುಕ ಕಡಲಲ್ಲಿ ದೊರೆತಿದೆ ಒಲವ ಮುತ್ತೊಂದು
ಬಚ್ಚಿಟ್ಟಿದೆ ಮನಸಿಲ್ಲಿ ಎದೆಯಾಳದ ಗುಟ್ಟಂತೆ,
ಶುರುವಾಗಿದೆ ಎದೆಯೊಳಗೆ ಒಲವ ಕಚಗುಳಿಯೂ
ಪ್ರೀತಿ ಒಳಗೊಳಗೆ ಇಲ್ಲಿ ಬದುಕೇ ಪ್ರೀತಿ ಎದೆಯೊಳಗೆ.

ಮನಸಿಲ್ಲಿ ನಿರ್ಮಲ ಹರಿಯುವ ತೊರೆಯಂತೆ
ಮೂಡಿವೆ ಎಲ್ಲೆಲ್ಲೋ ಮನದಲಿ ಪ್ರೀತಿಯ ಬಿಂಬಗಳೇ,
ಮನಸ ನದಿಯೊಳಗೂ ನೂರಾರು ಕಲರವವೇ
ಪ್ರತಿ ಉಸಿರಿನ ಜೊತೆಯಲ್ಲಿ ಮೂಡಿದೆ ಒಲವ ಸಂಗೀತ.

ಮನಸೊಳಗೆ ಮನಸಂತೆ ಮನಸಿಗೂ ಒಂದು ಜೊತೆಯಂತೆ
ಕನಸೊಳಗೆ ಕನಸಂತೆ ಇಲ್ಲಿ ಕನಸಿಗೂ ಒಂದು ಜೊತೆಯಂತೆ,
ಭೂಮಿ ಬಾನನು ಬೆಸೆದಂತೆ ಇಲ್ಲಿ ಪ್ರೀತಿಯ ಚಿತ್ತಾರ
ಒಲವ ಕನಸಲ್ಲಿ ಮನಸಾಗಿದೆ ಭಾವನೆಗಳ ಭಂಡಾರ.

ಪ್ರೀತಿ ಜಾತ್ರೆ...

ನನ್ನೂರಲಿ ನಡೆಯುತ್ತಿದೆಯಲ್ಲಿ ದೇವರಾ ಜಾತ್ರೆ
ಇಲ್ಲಿ ನನ್ನೆದೆಯಲ್ಲಿ ನಡೆಯುತ್ತಿದೆ ನಿನ್ನ ನೆನಪುಗಳ ಯಾತ್ರೆ,
ಊರ ಹರಸುವ ದೇವನಲ್ಲಿ ರಥದೊಳಗೆ ವಿರಾಜಮಾನ
ಪ್ರೀತಿ ಸುರಿಸುವ ನೀನಿಲ್ಲಿ ನನ್ನ ಎದೆಯೊಳಗೂ.

ತೇರನೆಳೆಯುವ ಭಕ್ತರದು ಭಕ್ತಿಯಾ ಘೋಷ
ಇಲ್ಲಿ ನನ್ನೆದೆಯೊಳಗೆ ಮೊಳಗಿದೆ ಪ್ರೀತಿಯಾ ಘೋಷ,
ಭಕ್ತರಲ್ಲಿ ಸಂತೃಪ್ತ ಹರಸೋ ದೇವನನು ಕಂಡು
ನಾನಿಲ್ಲಿ ಸಂತೃಪ್ತ ಮನಸ ಪರದೆಯಲಿ ನಿನ್ನ ಬಿಂಬವನು ಕಂಡು.

ಬದುಕ ತೇರನೆಳೆವೆ ನಿನ್ನೊಲವ ಜಾತ್ರೆಯಲಿ
ಕನಸುಗಳಿಂದ ಸಿಂಗರಿಸುವೆ ಈ ಒಲವ ಯಾತ್ರೆಯನು,
ಭಾವ ತೋರಣವಿಹುದಿಲ್ಲಿ ನಿನ್ನಯಾ ಸ್ವಾಗತಕೆ
ನಗುವ ಚೆಲ್ಲುತಿರು ನೀನಿಲ್ಲಿ ಹೃದಯ ಮಂದಿರದೆ.

ಬದುಕಾಗಿದೆ ಎನಗಿಲ್ಲಿ ನಿತ್ಯವೂ ಜಾತ್ರೆ
ನಿನ್ನ ಪ್ರೀತಿಯದು ಪ್ರತಿ ಕ್ಷಣವೂ ಪುಣ್ಯ ಯಾತ್ರೆ,
ಮನಸ ಕನಸುಗಳಿಗಿಲ್ಲಿ ಸುಗ್ಗಿಯಾ ಕಾಲ
ಬದುಕಿಲ್ಲಿ ಹರಸಿದೆ ನಿತ್ಯ ವಸಂತ ಕಾಲ.