ಹೇ ಸರ್ವಶಕ್ತ...

ಉದ್ಧರಿಸು ನೀನೆನ್ನ ಓ ಸರ್ವಶಕ್ತ
ಅಂಧಕಾರವ ಕಳೆಯೀಗ ಈ ಮನಸಿಂದಾ,
ಸಣ್ಣದೊಂದು ಜ್ಯೋತಿಯನು ನೀ ಉರಿಸಿ
ಮುಂದೆ ನುಗ್ಗುವ ಛಲವನ್ನ ಅನುಗ್ರಹಿಸು.

ಎಡವಿ ಬೀಳುವ ಭಯವಂತು ಎನಗಿಲ್ಲ
ಕೈ ಹಿಡಿದು ನಡೆಸುವವ ನೀ ಜೊತೆಗಿರಲು,
ಅಜ್ಞಾನವನು ಕಳೆದು ಜ್ಞಾನವನು ಭೋದಿಸು
ಬೆಳಗುವೆನು ಮನದಲ್ಲಿ ನಿನಗೊಂದು ದೀಪ.

ನನ್ನೊಳು ಮನೆಮಾಡಿರುವ ವೈರಿಗಳ ಸೋಲಿಸೆ
ಶಕ್ತಿಯನು ನೀಡೆನಗೆ ಹೇ ಭಗವಂತ,
ಅರಿಷಡ್ವರ್ಗಗಳೆಂಬ ವೈರಿಗಳ ನಿನ್ನ ಪಾದದಡಿಗೆ ನೂಕುವೆ
ಮುಕ್ತಿಯನು ಅನುಗ್ರಹಿಸು ಕಾಮ ಕ್ರೋಧ ಮದ ಮೋಹ ಲೋಭಕೆ.

ಬೆಳಗುವೆನು ನನ್ನೆದೆಯಲಿ ನಿನಗೊಂದು ನಂದಾದೀಪ
ದಯಮಾಡಿ ನೆಲೆಸು ನೀನಿಲ್ಲಿ ಹೇ ಸರ್ವಾಂತರ್ಯಾಮಿ,
ಭಕ್ತಿಯೆಂಬ ನೈವೇದ್ಯ ಅರ್ಪಿಸುವೆನು ನಿನಗೆ
ಪ್ರೀತಿಯೆಂಬ ಐಶ್ವರ್ಯವ ಅನುಗ್ರಹಿಸಬೇಕು ನೀನು.

ನನ್ನೊಳಗೆ ಪ್ರತಿದಿನವು ಕಾಣುವೆನು ನಿನ್ನಾ
ಮನುಜತೆಯ ಪಥದೊಳಗೆ ನೀ ಇರಿಸು ಎನ್ನಾ,
ಸತ್ಯ ಧರ್ಮದ ರಥವನ್ನ ತೋರಿಸು
ಬದುಕಿನ ಯಾತ್ರೆಯೊಳು ನೀನೆನ್ನ ಗೆಲ್ಲಿಸು.

ಒಲವೊಳಗೆ...

ಓ ಒಲವೇ ನೀನಿಂದು ಹರಸೆನ್ನನು
ಒಲವಿಂದ ಈ ಮನಸ ಮುನ್ನಡೆಸು ನೀ,
ಹರುಷಕ್ಕೆ ನಿನ್ನ ಹೆಸರು ನಾ ಕೊಡುವೆನು
ಮುನಿಸನ್ನ ನೀ ಮರೆತು ಬರಬೇಕಿದೆ...

ಜೊತೆಯಾಗು ಓ ಮನಸೇ ಈ ಪಯಣಕೆ
ನೋವಿಗೂ ನಲಿವಿಗೂ ನಾ ಹೆಗಲಾಗುವೆ,
ಪ್ರತಿಕ್ಷಣವೂ ನೀ ಅರಳು ಖುಷಿಯಿಂದಲೇ
ನಗುವಲ್ಲೇ ಮಗುವಾಗಿ ಜೊತೆಯಾಗುವೆ...

ಜಗವಿಲ್ಲಿ ಡೊಂಬರಾಟ ಈ ಪ್ರೀತಿಗೆ
ಕುಣಿಯೋಣ ಬಾ ಇಲ್ಲಿ ಜೊತೆಯಾಗಿಯೇ,
ಹುಸಿ ಕೋಪ ತುಂಟಾಟ ಕಣ್ಣಮುಚ್ಚಾಲೆಯೂ
ಈ ಪ್ರೀತಿಗೆ ಜಗವೆಂದೂ ಜಾಣ ಕುರುಡು...

ಬದುಕಿಲ್ಲಿ ಬೊಂಬೆಯಾ ಆಟದಂತೆ
ತಿಳಿದರೂ ತಿಳಿಯದಾ ಮಾಯೆಯಂತೆ,
ತಾಳ್ಮೆಯೂ ಇರಬೇಕು ಇಲ್ಲಿ ಈಸಲಿಕ್ಕೆ
ಧೈರ್ಯವೂ ಬೇಕಿಲ್ಲಿ ಜಗವ ಪ್ರೀತಿಸೋಕೆ...

ಖುಷಿಗೊಂದು ಕಾರಣವು ಯಾಕೆ ಬೇಕು
ಪ್ರೀತಿಯಾ ನೆಪವಿಲ್ಲಿ ಸಾಲದೇನು,
ಬದುಕೆಂಬುದೇ ಪ್ರೀತಿಯಾಗಿರಲು ಈ ಜಗದೊಳು
ನಾನು ನೀನಿಲ್ಲಿ ಒಲವಾ ರೀತಿಯಷ್ಟೇ...

ನನ್ನೊಲವೇ...

ನಿನ್ನ ಒಲವಿನ ಮುಂದೆ
ನಾನೆಂದೂ ಪ್ರೇಮಖೈದಿಯೂ,
ನಿನ್ನಾ ನಗುವಿನ ರೀತಿ
ನನಗೆಂದೂ ಆನಂದವೂ...

ಓ ಒಲವೇ ನಿನ್ನಯ ರೀತಿ
ಅದು ಎಷ್ಟು ಸುಂದರ,
ನಾನೆಂದು ನಿನಗಾಗಿ ಇಲ್ಲಿ
ಬೆಳದಿಂಗಳ ಚಂದಿರ...

ಮರೆಯುವೆ ನೂರು ನೋವ
ನಿನ್ನಾ ಪ್ರೀತಿಯ ರೀತಿಯಲಿ,
ಅಳುವೇ ಬರದು ಮುಂದೆ
ಈ ಜೀವನ ಜೋಕಾಲಿಯಲಿ...

ನೀನು ಇರಲು ಜೊತೆಗೆ
ಪ್ರತಿ ಕ್ಷಣವೂ ನನಗದು ಹಬ್ಬ,
ನಗುತಾ ಇರಲು ನೀನು
ಜೀವನವೆನಗೆ ನಗೆಹಬ್ಬ...

ಜೊತೆಗೆ ನೀನಿಡುವಾ ಹೆಜ್ಜೆ
ನನ್ನೆದೆಗೆ ಒಲವಾ ಕಚಗುಳಿಯೂ,
ಪ್ರತಿ ಹೆಜ್ಜೆಗೂ ಕಾವಲು ನಾನು
ನಿನ್ನೊಲವಿಗೆ ಸೇವಕನಾಗಿ...

ಚಂದದ ತೋರಣ ನೀನು
ಹೊಸ ಕನಸುಗಳ ಸ್ವಾಗತಕೆ,
ಓರಣಗೊಳಿಸು ಈಗ
ಈ ಬದುಕಿನ ರಥವನ್ನು...

ತೊಳಲಾಟ...

ಕನಸುಗಳು ಕರಗಿವೆ
ನೆನಪುಗಳ ಹುಡುಕುತಾ,
ಮನಸಿಲ್ಲಿ ಮೌನವೂ
ನೂರೊಂದು ತೊಳಲಾಟದಿ...

ಮನಸಿಂದೂ ಮರೆತಿದೆ
ಕನಸಿನಾ ಲೋಕವಾ,
ಕದವಿಲ್ಲಿ ಮುಚ್ಚಿದೆ
ಭಾವಗಳ ಮಿಲನಕೆ...

ಭಾವವೂ ಮೈನೆರೆದಿದೆ
ಒಂಟಿತನದಾ ನೋವಲಿ,
ಆಸೆಗಳು ದೂರಾಗಿವೆ
ನಾಳೆಗಳ ಹಂಗಿಲ್ಲದೇ...

ನಾಳೆಗೂ ಬೇಡವಾಗಿದೆ
ನಿನ್ನೆಗಳ ಕೈತುತ್ತದು,
ನಗುವಿಲ್ಲಿ ಮರೆತಿದೆ
ಕಾರಣ ಇಲ್ಲದೇ...

ಕಾಲದಾ ಓಟಕೆ
ಬದುಕಿಲ್ಲಿ ಮೈಮರೆತಿದೆ,
ಬದಲಾದ ಕಾಲವೂ
ಬದುಕನ್ನೇ ಮರೆತಿದೆ...

ಮುಳುವಾಗಿದೆ ಯಾತನೆ
ಹೃದಯದಾ ಹಾಡಿಗೆ,
ಮಿಡಿಯುವಾ ಹೃದಯವೂ
ಮೂಕವಾಗಿ ನಿಂತಿದೆ...