ಫಕೀರ...

ಬದುಕೆಂಬ ಬೃಂದಾವನದಲ್ಲಿ
ನಾನು ಒಬ್ಬ ಫಕೀರ,
ನೋವು ನಲಿವುಗಳೆಷ್ಟೇ ಇರಲಿ
ನಗುವೊಂದೇ ಅದಕ್ಕೆ ಪರಿಹಾರ...

ಹಂಗೇನೂ ಇಲ್ಲಾ ಇಲ್ಲಿ
ಸಂಬಂಧಗಳ ಸುಳಿಯೊಳಗೆ,
ಸ್ನೇಹಾನೇ ಎಲ್ಲಾ ಇಲ್ಲಿ
ಈ ಫಕೀರನ ಮನದ ಜೋಳಿಗೆಯೊಳಗೆ...

ಅಹಂಕಾರವು ಚಪ್ಪಲಿ ಇವಗೆ
ಈ ಜಗದ ಸುತ್ತಾಟಕ್ಕೆ,
ಧರ್ಮವೇ ಕಿರೀಟವು ಇಲ್ಲಿ
ಇವ ನುಡಿಯೋ ನ್ಯಾಯಕ್ಕೆ...

ನಂಬಿಕೆಯೇ ಮೂಲಮಂತ್ರ
ಬದುಕಿನಾ ಈ ಬೃಂದಾವನದಿ,
ಪ್ರೀತಿನೇ ಅಮೃತ ಇಲ್ಲಿ
ಪ್ರತಿ ನೋವನು ಗುಣಪಡಿಸೋಕೆ...

ಸಹನೆಯೇ ಯಜ್ಞ ಇಲ್ಲಿ
ಕೋಪ ತಾಪಗಳ ಭಸ್ಮ ಮಾಡೋಕೆ,
ಭರವಸೆಯಾ ನಾಳೆಯೊಳಗೂ
ಪ್ರೀತಿ ಹುಡುಕುವ ನಾನು ಒಬ್ಬ ಫಕೀರ...

ಬಯಲುದಾರಿ...

ಬದುಕಿನ ಬಯಲೊಳು
ಬೆತ್ತಲಾಗಬೇಡವೆ ಮನಸೇ,
ಸಿಹಿಯಾದರೆ ನೀನು ನುಂಗಿ ಬಿಟ್ಟಾರು
ಕಹಿಯಾದರೆ ನಿನ್ನ ಉಗುಳಿಯಾರು...

ಮನಸಿನ ಆಗಸದಿ
ಕನಸನು ತೆರೆದಿಡಬೇಡವೇ ಬದುಕೇ,
ಕಣ್ಣ್ ದೃಷ್ಟಿಯಾದೀತು ಕನಸೀಗೆ
ಕರಗಿ ಹೋದಾವು ನಾಳೆಗಳ ಖುಷಿಯೂ...

ಮುಖವಾಡಗಳ ಬದುಕೇ
ಬಣ್ಣಗಳ ಹಚ್ಚದಿರು ನೀನು,
ನಾಟಕವಾದೀತು ಬದುಕು
ಜಗದ ನಾಟಕ ಶಾಲೆಯಲಿ...

ಉರಿವ ಜ್ವಾಲೆಯಾದರೂ ಬದುಕು
ಸುಡುವ ಕೆಂಡವಾಗಬೇಡ ಮನವೇ,
ಬೂದಿಯಾದರೂ ಸರಿಯೇ
ಫಲವತ್ತಾಗಿರಲಿ ನೀ ನಡೆದ ಹಾದಿ...

ಹೋಗಿಬಿಡು ಕತ್ತಲೆಯೇ...

ನಗುವಾ ಗುಲಾಬಿ ನಾನು
ನಗುವೇ ಬದುಕು ನನ್ನದೂ,
ನಗುವ ಕಸಿಯೋಕು ಮೊದಲು
ಈ ಮುಳ್ಳುಗಳ ರುಚಿಯನು ನೋಡು...

ಪ್ರೀತಿಯೇ ಬದುಕು ನನ್ನದೂ
ಪ್ರೀತಿಯಲಿ ನಾ ಪ್ರೇಮಾಚಾರಿ,
ಮೋಸದಲಿ ಮನಸ ಗೆಲ್ಲಲಾರೆ
ನೀನಾದರೂ ವಾಮಾಚಾರಿ...

ನಂಬಿಕೆಯೇ ಬದುಕೂ ನನ್ನದು
ನನಗದುವೇ ಅಮೃತವೂ,
ಬೆರೆಸಲಾರೆ ನೀ ವಿಷವಾ
ಸಂಬಂಧಗಳ ಈ ಪಾತ್ರೆಯೊಳಗೆ...

ಧರ್ಮವೇ ಉಸಿರೂ ನನಗೇ
ಸತ್ಯವೇ ನಾ ನಡೆವ ಹಾದಿ,
ಕೆಣಕಿ  ಬಲಿಯಾಗುವೆಯೇತಕೆ
ಸಾಮ ಧಾನ ದಂಡ ಭೇದಕೆ...

ಬದುಕಿದು ಆ ಶಕ್ತಿಯ ಕೊಡುಗೆ
ನಾ ಕೋಟಿ ಹರಕೆಯಾ ಫಲ,
ಮಣಿಸಲಾರೆ ಓ ಕ್ಷುದ್ರಶಕ್ತಿಯೇ ನೀ
ಸತ್ಯದಾ ಬೆಳಕಿರುವವರೆಗೇ...