ಮಂಜಿನ ಹನಿ...

ಮನಸಿನ ಕಸವನು ಶುಚಿಗೊಳಿಸೋ

ಓ ಮೌನವೇ ಒಮ್ಮೆ ಮಾತಾಡು,

ಸಾವಿರ ಪ್ರಶ್ನೆಗಳಿಗೆ ಉತ್ತರವೂ

ನಿನ್ನಯ ಮರೆಯಲಿ ಅಡಗಿಹುದು...

ಕನಸನು ಹೆಣೆಯುವ ಭಾವಗಳೇ

ಮುಗಿಲಾಗಿ ಮನದ ಬಾಂದಳದಿ,

ಎದೆಯ ತುಂಬಿದ ಓ ನೆನಪುಗಳೇ

ಕುಶಿಯ ಮಳೆ ಸುರಿಸಿ ಬದುಕಿನಲಿ...

ಬದುಕಿನ ಪಯಣದ ಹಾದಿಯಲಿ

ಕಾಣದ ತಿರುವುಗಳು ನೂರಾರು,

ಅರಿವಿನ ಮರೆವಿನ ಜೊತೆಯಲ್ಲೇ

ಬದುಕಿನ ಓಟ ಸಾಗುವುದು...

ಕರಗುವುದು ಮರುಗುವುದು ಸಹಜ

ಮನಸು ಬದುಕಿನ ಹಾದಿಯಲಿ,

ಮಂಜಾಗಿ ಮಳೆ ಹನಿಯಾಗಿ

ಸುರಿಯಬೇಕು ಬೆರೆಯಬೇಕು ಈ ಬದುಕಿಲ್ಲಿ...