ಓ ಬದುಕೇ...

ಮತ್ತಷ್ಟು ಹೊರೆಯ ಹೊರಿಸಬೇಡ ಬದುಕೇ 

ಪುಟ್ಟ ಹೃದಯ ಭಾರವಾದೀತು,

ಚಿಂತೆಗಳ ಭಾರವೇ ಸಾಕಷ್ಟಿರುವಾಗ

ನಿಂತರೂ ನಿಂತುಬಿಡಬಹುದು ಒಮ್ಮೆ...

ಕರಗುತಿವೆ ಕನಸುಗಳು ಕಣ್ಣಂಚಿನಲೇ

ಜಾರುತಿರುವ ಕಣ್ಣಹನಿಗಳ ಜೊತೆಗೆ,

ಮನಸು ಮೂಕವಾಗುತಿದೆ ಇಲ್ಲಿ 

ಭಾವನೆಗಳ ಬಂಧ ಕಳಚಿ...

ಇರಬೇಕು ಇರುವಂತೆ  ಮನಸೇ 

ಎಲ್ಲಾ ಮರೆತು ನೀನು ಕಲ್ಲಾದಂತೆ,

ಜವಾಬ್ದಾರಿಗಳ ಬೆಚ್ಚನೆಯ ಹೊದಿಕೆಯೊಳಗೆ

ತಣ್ಣನೆಯ ನಿದ್ರೆಯಿರದ ನಾಳೆಗಳಲೂ...

ನೂರು ನೆನಪುಗಳ ಜೊತೆಗೆ

ಹೆಜ್ಜೆ ಹಾಕಬೇಕಿದೆ ಇಲ್ಲಿ ಮನಸು,

ನೂರು ನೋವುಗಳ ದಾಟಿ 

ಸಾಗಬೇಕಿದೆ ಬದುಕು ಎಲ್ಲಾ ಮರೆತು...