ನಿನ್ನವರಾರು ಬದುಕೇ...

ಬದುಕ ಬನದೊಳಗೆ ಮನಸ ಕಡಲೊಳಗೆ 

ಸಾವಿರ ಕನಸುಗಳ ನೂರು ನೆನಪುಗಳ ಮಾಲೆ,

ಬಂದು ಹೋದವರ ಬಂಧುಗಳಾದವರ 

ಲೆಕ್ಕವೆಲ್ಲಿದೆ ಮನಕೇ ಆ ಅನುಭಾವಕೆ...

ಎಲ್ಲೋ ಹರಿವ ತೊರೆ ಎಲ್ಲೋ ಧುಮುಕುವ ಝರಿ 

ಲೆಕ್ಕವಿಟ್ಟವರಾರು ಹರಿವ ಭಾವಕೇ,

ಕಳೆದುಕೊಂಡವರ ಕಳೆದು ಹೋದವರ 

ಹುಡುಕಿಕೊಟ್ಟಿತೇ ಬದುಕು ಕಾಲದ ಹರಿವಿನೊಳು...

ನೂರು ನೆನಪುಗಳ ತುಂಬಿ ನೂರು ಕನಸುಗಳ ತುಂಬಿ 

ಮನಸ ನಗಿಸಿದ ಬದುಕ ಹರಸಿದ ಬಂಧವಿಲ್ಲಿ,

ಯಾತ್ರೆಯ ಮುಗಿಸಿ ಹೊರಟು ನಿಂತಾಗ 

ಮನಸು ಮರುಭೂಮಿಯಂತೆಯಿಲ್ಲಿ...

ಹುಟ್ಟು ಸಾವಿನ ನಡುವೆ ಬದುಕು ನಡೆಯುತಿರಲು 

ನಿನ್ನವರಾರು ಇಲ್ಲಿ ಮನವೇ ಜೊತೆಗಾರರಾರು ಬದುಕೇ,

ಇರುವಷ್ಟು ದಿನವಷ್ಟೇ ಜಾತ್ರೆ ಮಿಕ್ಕಿದ್ದೆಲ್ಲವೂ ಯಾತ್ರೆ 

ನೂರು ನೆನಪುಗಳ ಜೋಳಿಗೆಯ ಜೊತೆಗೆ...