*ನಿರೀಕ್ಷೆ*
ಗೆಳೆಯಾ,
ನನ್ನೆದೆಯಾ
ಹೊಲದೊಳಗೆ
ಪ್ರೀತಿಯ

ಬೀಜವ
ಬಿತ್ತಿರುವೆ,
ನಿನ್ನ
ಒಲವೆಂಬ
ಮುಂಗಾರಿನ
ನಿರೀಕ್ಷೆಯಲಿ.

*ಒಲವ ಹನಿ*
ಮೋಡವಾಗಿ
ಕಾಡಬೇಡ
ಗೆಳತಿ
ಮನದ
ಆಗಸದಿ,
ಒಲವ
ಹನಿಯ
ಸುರಿಸಿಬಿಡು
ನನ್ನೆದೆಯಾ
ತೋಟದಿ.

*ಮುತ್ತು*

ಗೆಳತಿ
ಒಲವ
ಸಾಗರದಿ

ಮುಳುಗೆದ್ದ
ನನಗೆ
ಸಿಕ್ಕಿದ್ದು
ನಿನ್ನ
ಪ್ರೀತಿಯೆಂಬ
ಮುತ್ತು.

*ಚುಕ್ಕಿ*

ಗೆಳೆಯಾ
ನನ್ನ
ಪ್ರೀತಿಗೆ
ನೀನೇ
ಬೆಳ್ಳಿಚುಕ್ಕಿ,
ಮೂಡದಿರಲಿ
ಎಂದೂ
ಅನುಮಾನದ
ಕಪ್ಪುಚುಕ್ಕಿ.

ನನ್ನವಳು

ಮುಗಿಲ ಮಗಳಿವಳು,
ನಗುವ ಮಲ್ಲಿಗೆಯೂ...

ಬೆಳದಿಂಗಳ ಬಾಲೆಯಿವಳು,
ಚಂದಿರನ ಬಿಂಬವೂ...

ಧರೆಗಿಳಿದ ಅಪ್ಸರೆಯಿವಳು,
ನನ್ನ ಮನದನ್ನೆಯೂ...

ಕಿನ್ನರ ಲೋಕದ ಕಿನ್ನರಿಯಿವಳು,
ನನ್ನ ಕನಸಿಗೆ ರಾಯಭಾರಿಯೂ...

ಪ್ರೇಮದೂರಿನ ಒಡತಿಯಿವಳು,
ಮನಸ ಸೆಳೆದ ಮಾಯೆಯೂ...

ಶೃಂಗಾರ ರಸದ ಕಡಲಿವಳು,
ಪ್ರೀತಿಧಾರೆಯೆರೆವ ಕನ್ನಿಕೆಯೂ...

ಪದಗಳಲಿ ಪದವಾಗಿ ಕುಳಿತ ನೀರೆಯಿವಳು,
ಜನುಮ ಜನುಮದ ಅನುಬಂಧವೂ.

ಪ್ರೀತಿಯ ಹುಡುಗಿಗೆ...

ಪ್ರತಿ ಪ್ರೀತಿಗೂ ಒಂದು ಸ್ಪೂರ್ತಿಯಿದೆ ಹುಡುಗಿ,
ಒಲವ ಬಣ್ಣಿಸಲು ಪದಗಳ ಕೊರತೆಯೆಲ್ಲಿದೆ ಇಲ್ಲಿ?
ಷಹಜಾನನ ತಾಜ್ ಮಹಲ್ ನಾ ಕಟ್ಟಲಾರೆ,

ಗೋರಿಯೊಳಗಿನ ಮುಮ್ತಾಜ್ ನೀನಾಗದಿರು ಎಂದೂ.
ಪ್ರೀತಿಯಲಿ ರೋಮಿಯೋ ನಾನಾಗಲಾರೆ,
ಜೂಲಿಯೆಟ್ ನೀನಾಗಬೇಡ ಗೆಳತಿ.
ಪ್ರೇಮಿ ನಾನು,ಸಲಿಂ ಅಂತು ಅಲ್ಲವೇ ಅಲ್ಲ,
ಅನಾರ್ಕಲಿ ನೀನಾಗಬೇಕೆಂಬ ಆಸೆಯಂತೂ ಇಲ್ಲವೇ ಇಲ್ಲ.
ದೇವದಾಸನ ಪ್ರೀತಿಯಂತು ನನ್ನದಲ್ಲ,
ಚಂದ್ರನ ತಂದಿಡುವ ಪೊಳ್ಳು ಆಣೆಯಂತು ಇಲ್ಲವೇ ಇಲ್ಲ.
ಅಪ್ಪಟ ಮನಸಿನ ಸ್ವಚ್ಚ ಪ್ರೀತಿಯಿದು,
ಆಣೆಗಳ ಮಾತಾಡಿ ಮನಸ ಕಟ್ಟಿ ಹಾಕಲಾರೆ ಹುಡುಗಿ.
ಹಂಗಿನರಮನೆಯಲ್ಲ ಇದು ಪ್ರೀತಿಯರಮನೆ,
ಬಲಗಾಲಿಟ್ಟು ಬರಲೇಬೇಕು ನೀನು ಈ ಪ್ರೀತಿಯರಮನೆಗೆ ನನ್ನ ಮನದೊಡತಿಯಾಗಿ,

ಈ ಪ್ರೀತಿಯ ಗುಡಿಗೆ ದೇವತೆಯಾಗಿ...