ಅನುಮಾನ...

ಗೊಂದಲದ ಹುತ್ತ ಮನಸು ಇಲ್ಲಿ
ಸಂಶಯದ ಹಾವು ಹೆಡೆಯಾಡುತಿದೆಯಲ್ಲಿ,
ವಿಷವೇ ವಿಷವೂ ಮನಸು ಮೈಯು ಈಗ
ಕಚ್ಚಬೇಕೆಂದೇ ಇಲ್ಲ ಭಾವನೆಗಳು ಸಾಯಲು.

ಹತ್ತಾರು ಬಣ್ಣ ಈ ಅನುಮಾನಕೇ
ಜಾತಿ ವರ್ಣಗಳು ಬೇಕು ಕಾರಣ ಹುಡುಕೋಕೆ,
ಧರ್ಮ ಅಧರ್ಮಗಳ ಅರಿವು ಇಲ್ಲದೆ
ಮನುಜತೆಯು ಸಾಯುತಿದೆ ಈ ವಿಷಬೀಜಕೇ.

ನೂರಾರು ಮುಖವಾಡ ಇಲ್ಲಿ ವಿಜ್ರಂಭಿಸುತಿದೆ
ಮನಸು ತನ್ನೊಳಗೆ ತಾನು ಕೊಳೆಯುತಿದೆ,
ಕಳೆಯುತ್ತಿದೆ ತನ್ನ ಪುಣ್ಯದಾ ಫಲವಾ
ತುಂಬುತ್ತಿದೆ ಮನಸಲ್ಲಿ ಪಾಪದಾ ಕರ್ಮಗಳಾ.

ಪ್ರೀತಿಯದು ಸಾಯುತ್ತಿದೆ ಅನುಮಾನಕೆ
ಮನಸೀಗ ಬೆತ್ತಲೆಯು ಸಂಶಯಕೆ,
ಉಸಿರ ಮರೆತ ಮನಸೀಗ ಕೊಲೆಯಾಗಿದೆ
ಹೊತ್ತಿಸುತ್ತಿದೆ ಅನುಮಾನದ ಕಿಡಿಯ ಜೀವಗಳೊಳಗೆ.

ಭಾವನೆಗಳು ಸತ್ತು ಇಲ್ಲಿ ನಾರುತ್ತಿವೆ
ರಣಹದ್ದುಗಳ ಕೇಕೆ ಮುಗಿಲು ಮುಟ್ಟುತ್ತಿದೆ,
ಸ್ವರ್ಗ ನರಕಗಳು ಬರೇಯ ಕಲ್ಪನೆಯಾಗದೆ
ಸುತ್ತಮುತ್ತಲೂ ಸೃಷ್ಟಿಯಾಗಿವೆ ಬದುಕಿನೊಳಗೆ.