ನೆನಪು...

ಗುದ್ದಾಡಿ ಗೆದ್ದವರಿಲ್ಲಾ
ನೆನಪುಗಳ ಜಂಜಾಟದಲಿ,
ಗೆದ್ದವರು ಕಳೆದೊದ್ರಲ್ಲಾ ಗೆಳತಿ
ಸೋತವರು ಪ್ರೇಮಿಗಳೇ ಎಲ್ಲಾ...

ನೆನಪುಗಳ ಕಾಳಗದೊಳಗೆ
ಕರಗಿ ಹೋದ ಕನಸುಗಳೆಷ್ಟೋ,
ಮಾತುಗಳೇ ಮರೆತುಹೋಗಿ
ಮೌನವಾದ ಬದುಕುಗಳೆಷ್ಟೋ...

ಒಮ್ಮೆ ಸ್ನೇಹವಾಗಿ ಮತ್ತೆ ಪ್ರೀತಿಯಾಗಿ
ಕಾಡಿದ ನೆನಪುಗಳೆಷ್ಟೋ ಗೆಳತಿ,
ಒಮ್ಮೆ ಸಿಹಿಯಾಗಿ ಮತ್ತೆ ಕಹಿಯಾಗಿ
ಜಾರಿ ಹೋದ ಕಣ್ಣೀರಿಗೆ ಲೆಕ್ಕವಿಲ್ಲಾ ಸಖೀ...

ಬದುಕು ಇಲ್ಲಿ ಚಲಿಸುವ ಮೋಡ
ನೆನಪುಗಳ ಮಳೆ ಮಿಂಚುಗಳ ಜೊತೆ,
ಕೊಚ್ಚಿ ಹೋಗಲೂಬಹುದು ಮನಸು
ನೆನಪುಗಳ ಅತಿವೃಷ್ಟಿಯಲಿ...

ಪಯಣ...

ನೀರ ಮೇಲಿನ ಗುಳ್ಳೆ
ಬದುಕು ಇಲ್ಲಿ ಮನಸೇ,
ನಾಳೆಯೆಂಬ ಬಿಸಿಲ ಕುದುರೆ
ಏರೋ ಚಿಂತೆ ಇಂದು ಏಕೆ...

ನಾಳೆ ನಿನ್ನದಲ್ಲಾ
ಎಂಬ ಚಿಂತೆ ಯಾಕೆ,
ಇಂದು ಕೈಯಲಿರುವಾಗ
ಖುಷಿಯಿಂದ ಬಾಳಬೇಕು ಇಲ್ಲಿ...

ಬದುಕೋ ಭೂಮಿ ಕೂಡ
ಗುಂಡಗೆ ತಿರುಗುತಿಹುದು ಇಲ್ಲಿ,
ನೋವು ನಲಿವು ಎಲ್ಲಾ
ಮತ್ತೆ ಮತ್ತೆ ಬರುವುದಿಲ್ಲಿ...

ಕಳೆದು ಹೋದ ಕಾಲ
ಮತ್ತೆ ಬರದು ಎಂಬುದೊಂದು ಸತ್ಯ,
ಆದರೆ ಕಳೆದುಕೊಂಡ ನಗುವಾ
ತಿರುಗಿ ಪಡೆಯಬಹುದು ಇಲ್ಲಿ...

ನೋವಿಗೆ ಕಾರಣ ನೂರು
ನಗುವಿಗೆ ಕಾರಣ ಬೇಕಿಲ್ಲಾ,
ಬದುಕಿನ ಪಯಣ ಮೂರು ದಿನ
ನಗುವಿರಲಿ ಅಲ್ಲಿ ಪ್ರತಿದಿನ...

ಅವಳು...

ನಾನು ಮೆಚ್ಚಿದ ಮೊದಲ ನಗುವು
ಮನಸು ಮೆಚ್ಚಿದ ತೊದಲ ನುಡಿಯು,
ಪ್ರೀತಿ ಕಲಿಸಿದಾ ಮೊದಲ ಹೆಣ್ಣು
ಬದುಕು ಬಯಸಿದಾ ಮೊದಲ ಕನಸು...

ಬದುಕು ಹರಸಿದ ಮೊದಲ ಗೆಳತಿ
ಮನಸ ಹರಸಿದ ಮೊದಲ ಪ್ರೀತಿ,
ಭಾವಗಳಿಗೆ  ರೆಕ್ಕೆ ಕಟ್ಟಿದಾಕಿ
ಮೊದಲು ಮೂಡಿದಾ ಒಲುಮೆಯ ರೀತಿ...

ಅವಳೊಂದು ನಗುವ ಬುಗ್ಗೆ
ಬದುಕಲಿ ಭರವಸೆಯ ಚಿಲುಮೆ,
ಕೋಪವಿರದ ಮನಸು ಅವಳದು
ನೋವಲೂ ನಗುವ ಗುಣದವಳಾಕೆ...

ನನ್ನೊಳಗಿನ ಕವಿತೆಯೀಕೆ
ಕನಸಿಗೆ ಎಂದೂ ಸ್ಫೂರ್ತಿಯವಳು,
ನನ್ನೊಳಗಿನ ಒಲವ ಮನಸೇ
ಗಂಡಿನೊಳಗಿನ ಹೆಣ್ತನವೂ ನೀ...

ಅಂತರಂಗ...

ಒಳಗೊಳಗೆ ಅಳುವ ಮನಸೀಗೆ
ಯಾವ ಮದ್ದು ಇಲ್ವೆ ಭಗವಂತ,
ಕಾರಣ ಇಲ್ಲದೆ ಕಾಡೋ ನೋವಿಗೆ
ಕಾರಣ ಕೊಡಲಿ ನಾ ಏನಂತ...

ವರವೋ ಇದು ಶಾಪವೋ
ತಿಳಿಯಲಿ ನಾ ಹೇಗಂತ,
ಮನಸಿನ ಈ ಕಳವಳಕೆ
ಹೇಳಲೇ ನಾನು ಆತಂಕ...

ಮನಸಿನ ಗಾಯ ಮಾಗೋಕೆ
ನಗುವಿನ ಮುಲಾಮು ಹಚ್ಚಿದೆ,
ಒಳಗಿನ ನೋವು ಹೆಚ್ಚಾಗಿರೆ
ನಗುವಿನ ಲೇಪವೂ ಕರಗಿದೆ...

ಹೃದಯದ ಗಾಯ ಮಾಸೋಕೆ
ಔಷಧಿ ಯಾವುದು ಹೇಳಪ್ಪ,
ಕಾಯಿಲೆಯಿಲ್ಲದೆ ಜೀವ ನರಳುತಿರೆ
ಬದುಕಿಸೊ ಮದ್ದು ಯಾವುದು ಭಗವಂತ...