ಕಾಲತೀತ...

ಉರಿದು ಉಳಿದ ಬೂದಿಯಲಿ 

ಕಾಲದ ಪಾಠವು ಕಂಡಿತ್ತು,

ಬದುಕಿನ ಯಾತ್ರೆಯ ತುಂಬೆಲ್ಲಾ 

ಬರೀಯ ನೆನೆಪುಗಳು ಮಾತ್ರ ಜೊತೆಯೆಂದು...

ಕಾಲವು ನೋವಿಗೆ ಕರಗೋದಿಲ್ಲ 

ಜೊತೆಗೆ ಸಾಂತ್ವನಕ್ಕೆ ನಿಲ್ಲೋದಿಲ್ಲ,

ಉರುಳುತ್ತಾ ಸಾಗುವುದೇ ಅದರ ಕಾಯಕ 

ಮರೆಸಿ ಮೆರೆಸೋದಷ್ಟೇ ಕಾಲದ ಧರ್ಮ...

ನಲಿವಿಗೂ ಇಲ್ಲಿ ಸಂಭ್ರಮವಿಲ್ಲ

ನಲಿದಾಡೋಕು ಕಾಲದ ಕಟ್ಟಳೆಯಿಲ್ಲ,

ಕಾಲವು ಮಗ್ಗುಲು ಬದಲಾಯಿಸಿದಾಗಲೆಲ್ಲ  

ಎಲ್ಲರ ಕುಣಿಸೋದನ್ನ ಮಾತ್ರ ಮರೆಯೋದಿಲ್ಲ...

ಕಾಲವು ಕೊಡುವ ತಿರುವುಗಳಾ

ಹಿಂತಿರುಗಿ ನೋಡೋಕು ಇಲ್ಲಿ ಸಮಯವಿಲ್ಲ,

ಪರಿವರ್ತನೆ ಜಗದ ನಿಯಮವಾದರೆ

ತಿರುಗೋದಷ್ಟೇ ಕಾಲಚಕ್ರದ ನಿಯಮ...