ಅನಾವರಣ...

ಬದುಕೋದು ಸುಲಭ ಇಲ್ಲಿ ನೋವುಗಳ ಜೊತೆಗೆ 

ಕಾಲ ಕಳೆಯೋದು ಕಷ್ಟ ನೆನಪುಗಳ ಜೊತೆಗೆ,

ನಗುವುದೇನೋ ಸುಲಭ ಇಲ್ಲಿ ಗುಂಪಿನೊಳಗೆ 

ಮನವ ಸಂತೈಸುವುದು ಕಷ್ಟ ಏಕಾಂತದೊಳಗೆ...

ಪರರ ಸಂತೈಸುವುದೇನೋ ಸುಲಭ ಇಲ್ಲಿ 

ನಿರ್ಲಿಪ್ತವಾಗಿ ದಾರಿ ಸವೆಸೋದು ಕಷ್ಟ ಬದುಕಲ್ಲಿ,

ನೂರು ಕನಸುಗಳಿಗೆ ಜೀವವಾಗೋದು ಸುಲಭ 

ಮನದೊಳಗೆ ನೂರು ಆಸೆಗಳ ಸಾಕೋದು ಕಷ್ಟ ...

ಭರವಸೆಯ ತುಂಬುವುದು ಸರಳ ಇಲ್ಲಿ 

ನಂಬಿಕೆಯಾ ಉಳಿಸೋದು ಕಷ್ಟ ಜಗದಲ್ಲಿ,

ಪ್ರೀತಿಯ ಹಂಚೋದು ಸುಲಭ ಬದುಕಲ್ಲಿ 

ಬದುಕ ಪ್ರೀತಿಸೋದೇ ಕಷ್ಟ ನಾಳೆಗಳಲ್ಲಿ...

ಜಗದ ಪ್ರಶ್ನೆಗಳಿಗೆ ಉತ್ತರಿಸುವುದೇನೋ ಸುಲಭ 

ಅತೃಪ್ತ ಆತ್ಮಗಳ ಕುಹಕಕ್ಕೆ ಕಿವಿಯಾಗುವುದು ಕಷ್ಟ,

ನಾವಿರುವಂತೆ ಬದುಕುವುದು ಚಂದ ಇಲ್ಲಿ 

ಬೇರೆಯವರಿಗಾಗಿ ನಟಿಸೋದೇ ಕಷ್ಟ ಬದುಕಲ್ಲಿ...