ಬದುಕೇ...

ಪ್ರೀತಿಸುವೆ ಎಂದಿನಂತೆಯೇ ನಿನ್ನನೂ 

ಬದುಕೇ ಕಾಣದ ನಾಳೆಗಳಲೂ,

ಹರಸಬೇಕು ಎಂದಿನಂತೆಯೇ ನೀನು 

ನನ್ನನೂ ಕಂಡೂ ಕಾಣದಂತೆಯೇ...

ಸೋತು ಬಿಡುವೆ ನಿನಗೆ ಒಮ್ಮೆ ನಾನು 

ಪ್ರತಿಕ್ಷಣವೂ ಗೆಲ್ಲಲು ನಿನ್ನನ್ನೂ,

ಮೌನವಾಗಿ ಒಪ್ಪಿಬಿಡು ಈಗ ನೀನು 

ಕನಸಿನಲ್ಲೂ ಅಪ್ಪಿಕೊಳ್ಳುವೆ ಎಂದೂ ನಾನು...

ಹೆಚ್ಚೇನೂ ಆಸೆಗಳಿಲ್ಲ ನಿನ್ನಿಂದ 

ಇರುವುದೆಲ್ಲವೂ ಹುಚ್ಚು ಆಸೆಗಳೇ ನಿನ್ನಲ್ಲಿ ,

ಮುನಿಸ ಮರೆತು ರಾಜಿಯಾಗು ನೀನಿಲ್ಲಿ 

ನಗುತಾ ನಾನು ನನ್ನೇ ಮರೆವೆ ಜಗದಲ್ಲಿ...

ಒಂದು ಕ್ಷಣದೇ ಮರೆತು ಬಿಡುವೆ 

ನೂರು ನೋವುಗಳ ನಿನ್ನ ಅಂಗಳದಿ,

ಒಂದು ಕ್ಷಣ ನಕ್ಕುಬಿಡು ಸಾಕು ನೀನು 

ನಗುತಲಿರುವೆ ಬಿಟ್ಟು ಹೋಗುವ ಕ್ಷಣದವರೆಗೂ...