ನಿನ್ನವರಾರು ಬದುಕೇ...

ಬದುಕ ಬನದೊಳಗೆ ಮನಸ ಕಡಲೊಳಗೆ 

ಸಾವಿರ ಕನಸುಗಳ ನೂರು ನೆನಪುಗಳ ಮಾಲೆ,

ಬಂದು ಹೋದವರ ಬಂಧುಗಳಾದವರ 

ಲೆಕ್ಕವೆಲ್ಲಿದೆ ಮನಕೇ ಆ ಅನುಭಾವಕೆ...

ಎಲ್ಲೋ ಹರಿವ ತೊರೆ ಎಲ್ಲೋ ಧುಮುಕುವ ಝರಿ 

ಲೆಕ್ಕವಿಟ್ಟವರಾರು ಹರಿವ ಭಾವಕೇ,

ಕಳೆದುಕೊಂಡವರ ಕಳೆದು ಹೋದವರ 

ಹುಡುಕಿಕೊಟ್ಟಿತೇ ಬದುಕು ಕಾಲದ ಹರಿವಿನೊಳು...

ನೂರು ನೆನಪುಗಳ ತುಂಬಿ ನೂರು ಕನಸುಗಳ ತುಂಬಿ 

ಮನಸ ನಗಿಸಿದ ಬದುಕ ಹರಸಿದ ಬಂಧವಿಲ್ಲಿ,

ಯಾತ್ರೆಯ ಮುಗಿಸಿ ಹೊರಟು ನಿಂತಾಗ 

ಮನಸು ಮರುಭೂಮಿಯಂತೆಯಿಲ್ಲಿ...

ಹುಟ್ಟು ಸಾವಿನ ನಡುವೆ ಬದುಕು ನಡೆಯುತಿರಲು 

ನಿನ್ನವರಾರು ಇಲ್ಲಿ ಮನವೇ ಜೊತೆಗಾರರಾರು ಬದುಕೇ,

ಇರುವಷ್ಟು ದಿನವಷ್ಟೇ ಜಾತ್ರೆ ಮಿಕ್ಕಿದ್ದೆಲ್ಲವೂ ಯಾತ್ರೆ 

ನೂರು ನೆನಪುಗಳ ಜೋಳಿಗೆಯ ಜೊತೆಗೆ...

ಬೆಳಕು...

ಸವೆಯುವ ಹಾದಿಯೊಳು ಸರಿದಿದೆ ಕಾಲ 

ಸರಿಸುತ ಬದುಕಿನ ಭಾವೋದ್ವೆಗ,

ಹೊಸ ಹಾಡು ಹೊಸ ಪಾಡು ಭಾವಕ್ಕೆ 

ಹೊಸದೇನಿಲ್ಲ ನಿನ್ನೆಯಂತೆಯೇ ಎಲ್ಲಾ ಬದುಕಿಗೆ...

ಸರಿದು ಹೋದರೂ ಹರಿದು ಹೋಗದ ಮಾಯೆ 

ನೆನಪೆಂಬುದು ನೆಪವೂ ಇಲ್ಲಿ ಬದುಕಿಗೆ,

ಬಿಟ್ಟೆನೆಂದರೂ ಬಿಡದೇ ಕಾಯುವ ಛಾಯೆ

ನಿನ್ನೆ ನಾಳೆಗಳೆಂಬ ಹಂಗಿಲ್ಲದೆ...

ಕಳೆದುಹೋದುದ ಹುಡುಕುತಿದೆ ಮನವು

ಪುನಃ ಬರಲಾರದೆಂಬ ಅಂತರ್ಯದ ಕೂಗು ಕೇಳದೇ,

ಮತ್ತೆ ಮತ್ತೆ ಮೂಡುವುದು ಇಲ್ಲಿ ಭರವಸೆಯ ಬೆಳಕು

ನೂರು ಹಂಬಲಗಳ ಬಲದ ನಡುವೆ...

ಒಲವೆಂಬ ಚಂದ್ರಮ ಬದುಕ ಹಾದಿಯಲಿ 

ಬೆಳದಿಂಗಳಾಗಿ ಬೆಳಕ ಬೀರುತಿರಲು,

ಹೊಸದೊಂದು ಅಧ್ಯಾಯ ಬದುಕ ಪುಟದಲಿ

ನೂರು ನೋವುಗಳ ಮರೆತು ಮುನ್ನಡೆಯಲು...

ಕಾಲತೀತ...

ಉರಿದು ಉಳಿದ ಬೂದಿಯಲಿ 

ಕಾಲದ ಪಾಠವು ಕಂಡಿತ್ತು,

ಬದುಕಿನ ಯಾತ್ರೆಯ ತುಂಬೆಲ್ಲಾ 

ಬರೀಯ ನೆನೆಪುಗಳು ಮಾತ್ರ ಜೊತೆಯೆಂದು...

ಕಾಲವು ನೋವಿಗೆ ಕರಗೋದಿಲ್ಲ 

ಜೊತೆಗೆ ಸಾಂತ್ವನಕ್ಕೆ ನಿಲ್ಲೋದಿಲ್ಲ,

ಉರುಳುತ್ತಾ ಸಾಗುವುದೇ ಅದರ ಕಾಯಕ 

ಮರೆಸಿ ಮೆರೆಸೋದಷ್ಟೇ ಕಾಲದ ಧರ್ಮ...

ನಲಿವಿಗೂ ಇಲ್ಲಿ ಸಂಭ್ರಮವಿಲ್ಲ

ನಲಿದಾಡೋಕು ಕಾಲದ ಕಟ್ಟಳೆಯಿಲ್ಲ,

ಕಾಲವು ಮಗ್ಗುಲು ಬದಲಾಯಿಸಿದಾಗಲೆಲ್ಲ  

ಎಲ್ಲರ ಕುಣಿಸೋದನ್ನ ಮಾತ್ರ ಮರೆಯೋದಿಲ್ಲ...

ಕಾಲವು ಕೊಡುವ ತಿರುವುಗಳಾ

ಹಿಂತಿರುಗಿ ನೋಡೋಕು ಇಲ್ಲಿ ಸಮಯವಿಲ್ಲ,

ಪರಿವರ್ತನೆ ಜಗದ ನಿಯಮವಾದರೆ

ತಿರುಗೋದಷ್ಟೇ ಕಾಲಚಕ್ರದ ನಿಯಮ...

ಅಂತರ್ಪಟ...

ಯಾರೋ ಓದಿ ಯಾರೋ ಬರೆದ 

ಸುಂದರ ಸಾಲುಗಳಲ್ಲ ಬದುಕು,

ಕಾಲಕ್ಕೆ ತೋಚಿ ಕಾಲವೇ ಗೀಚಿದ 

ವಿಧಿಯೆಂಬ ಓದಲಾರದ ಗ್ರಂಥವಿದು...

ಎಲ್ಲೋ ಹುಟ್ಟಿ ಎಲ್ಲೋ ಬೆಳೆದು

ಗಮ್ಯವ ಸೇರೋಕು ಬಗೆಯುಂಟು,

ಎಲ್ಲೋ ಮೆರೆದು ಎಲ್ಲವ ಮರೆತು 

ಹೊರಡುವ ಸಮಯವೂ ಇಲ್ಲುಂಟು...

ನೆನಪಿಗೂ ಭಾರ ಮರೆವಿಗೂ ಭಾರ 

ಕಾಡುವ ಕಾಲದ ಕಥೆಯಿಲ್ಲಿ,

ಬಂಧವ ಹಚ್ಚಿ ಭಾಂದವ್ಯ ಬೆಸೆದು 

ಚುಚ್ಚುವ ಸೂಜಿಯಾ ಮೊನೆಯಿಲ್ಲಿ...

ಯಾವುದೋ ದೇಹಕೆ ಯಾವುದೋ ಆತ್ಮ

ಕಾಲದ ಆಯ್ಕೆಯ ಕೈಪಿಡಿಯೊಳಗೆ,

ಜನನ ಮರಣದ ಚಕ್ರದ ಸುರುಳಿಯೊಳಗೆ

ಪಯಣವಿದು ನಿರಂತರ ಅಂತರಾತ್ಮದ್ದು...

ಕಾರಣವೂ ಬೇಕೇ...

ಮುಂಜಾನೆ ನಗುವ ಮನಸೇ 

ಮುಸ್ಸಂಜೆಯಾದರೆ ಕನಸೇ,

ಹಗಲೆಲ್ಲ ಸುತ್ತಾಡಿ ಬರುವೇ 

ಸಂಜೆಗೆ ಒರಗೋಕೆ ಬೇಕೊಂದು ಭುಜವೇ...

ಖುಷಿಯ ನಡುವೆ ಒಮ್ಮೆ ಮೌನ

ಅಳುವಿನ ಜೊತೆಗೊಮ್ಮೆ ಧ್ಯಾನ,

ಅಂಟಿದೆ ಒಂಟಿತನದ ತಾಪ 

ಬದುಕಲ್ಲಿ ಬಯಸಿ ಪಡೆದ ಶಾಪ...

ಮಿಂಚು ಕಂಗಳ ತುಂಬಾ 

ಬರೀಯಾ ನೀಲ ನೀಲ ಕನಸು,

ಸಾಗರಕೂ ಪೈಪೋಟಿ ಏನೋ

ಆಳ ಅಗಲ ತಿಳಿಯಲಾಗದ ವೇಗ...

ಬರಿದು ಕಾರಣವೂ ಈಗ 

ಬದುಕಿಲ್ಲಿ ನಗದೇ ಇರಲು,

ಮನಸೇ ನೀನು ಮಗುವಂತೆ ಇರಲು 

ಪ್ರೀತಿಯೇ ಹುಡುಕುತ್ತಾ ಬರದೇ...

ಎದೆಯಾಳದ ಕವಿತೆ...

ಎದೆಯ ಮೀಟಿದ ಪದಗಳೆಲ್ಲವೂ

ಕವಿತೆಯ ಸಾಲುಗಳಾಗಬಲ್ಲವೇ,

ಮನಸು ಕಂಡ ಕನಸುಗಳೆಲ್ಲವೂ 

ಬದುಕ ಬರೆಯಬಲ್ಲವೇ...

ಮನಸು ಗುನುಗಿದ ಸಾಲುಗಳೆಲ್ಲ

ಸಂಗೀತವಾಗಬಲ್ಲದೆ ಬದುಕಿಗೆ,

ಮೌನವಾಗೇ ಉಳಿದ ಪದಗಳೆಲ್ಲ 

ಶಾಂತವಾಗಿಸಬಲ್ಲುದೇ ಮನಸ ಕಡಲನು...

ಆಸೆಯ ಬೆನ್ನು ಹತ್ತಿದ ಬದುಕಿಗೆ

ಸಿಗಬಹುದೇ ಇಲ್ಲಿ ಅಲ್ಪ ತೃಪ್ತಿಯೂ,

ಕನಸುಗಳು ಸಾಕಾರಗೊಂಡ ಮನಸಿಗೆ 

ಸಿಗಬಹುದೇ ಇಲ್ಲಿ ಆತ್ಮ ಸಂತೃಪ್ತಿಯೂ...

ಪ್ರಶ್ನೆಗಳ ಸಂತೆಯೊಳಗೆ ಸಂಜೆ ಸರಿಯುತ್ತಾ

ಬದುಕ ಬೆಳದಿಂಗಳಾ ರಾತ್ರಿಗಳೊಳಗೆ,

ಉತ್ತರವು ಸಿಗಬಹುದೇ ಬದುಕ ಮುಂಜಾನೆಗೆ

ನೇಸರನು ಬೀರುವನೇ ಹೊಸ ಬೆಳಕೊಂದನು...

ದೀಪಾವಳಿ...

ಬೆಳಗಿಸು ಬೆಳಕಿನ ಕಿಡಿಯೊಂದನು ಬದುಕೇ 

ಮನಸನು ಬೆಳಗುವ ಬೆಳಕನು,

ಕತ್ತಲೆಯ ಕರಗಿಸುವ ಬೆಳಕನು 

ಲೋಕಕೆ ದೀಪವಾಗುವ ಬೆಳಕನು...

ಬೆಳಗಿಸು ಮನದಲಿ ಏಕಾಗ್ರತೆಯೆಂಬ ಬೆಳಕನು

ಜ್ಞಾನದ ದೀಪವ ಬೆಳಗುವ ಬೆಳಕನು,

ಕೋಟಿ ಕನಸುಗಳ ಹುಟ್ಟಿಸೋ ಬೆಳಕನು

ಬದುಕಲಿ ನಗುವ ಹರಸುವ ಬೆಳಕನು...

ಬೆಳಗಿಸು ಕರ್ಮದ ಬೆಳಕನು ಬದುಕೇ

ಪುಣ್ಯದಂತೆ ಹಿಂಬಾಲಿಸೋ ಬೆಳಕಿನ ಕಿಡಿಯನು,

ಕತ್ತಲೆಯೊಳು ಮಿಂಚಂತೆ ಮಿನುಗೋ ಬೆಳಕನು

ಧರ್ಮವ ಧರಿಸುವ ಬೆಳಕನು...

ಬದುಕೇ ಬೆಳಗಿಸು ಭಕ್ತಿಯೆಂಬ ಕಿಡಿಯನು 

ಮನವ ಮಂದಿರವಾಗಿಸುವ ಬೆಳಕನು,

ಹರಸು ಕೋಟಿ ತಾರೆಗಳ ಬೆಳಕನು

ಆತ್ಮವೇ ಪರಮಾತ್ಮನಾಗುವ ಬೆಳಕನು...