ವಸಂತಗೀತೆ...

ಮರೆಯಾದ ನೆನಪುಗಳ

ಮತ್ತೆ ಹುಡುಕಬೇಕು,

ಕಾಲ ಸರಿಯುತಿರಲು

ನಾಳೆಗೆ ಪಾಠ ಹೇಳಬೇಕು...

ಕಾಡುವ ಕನಸುಗಳ

ಕೂಡಿ ಹಾಕಬೇಕು,

ಒಂದಷ್ಟು ದಿನಗಳು

ಒಲವಿನಲಿ ತೇಲಬೇಕು...

ಮನದ ಭಾವಗಳಿಗೆ

ಮೌನದ ಭಾಷೆಯಾಗಬೇಕು,

ಹಾಡೊಂದು ಮೂಡಬೇಕು

ಆತ್ಮದ ಸಾಹಿತ್ಯದಂತೆ...

ಉರುಳೋ ಕಾಲವಿಲ್ಲಿ

ಓಡೋಡಿ ಸಾಗುತಿಹುದು,

ಮತ್ತೆ ಮತ್ತೆಯಿಲ್ಲಿ 

ಮಳೆಬಿಲ್ಲು ಮೂಡಬೇಕು...

ಪ್ರೀತಿ ಚಿಗುರಬೇಕು

ನಿತ್ಯ ವಸಂತದಂತೆ,

ಜೀವ ನಗುತಿರಬೇಕು

ಬದುಕು ಅನಂತವೆಂಬಂತೆ...

ಚಂದ್ರಯಾನ...

ನೇಸರನಿಲ್ಲದ ಊರಿನಲಿ

ಚಂದ್ರಬಿಂಬದ ತೇರಿನೊಳು,

ಚುಕ್ಕಿ ತಾರೆಗಳ ಮೆರವಣಿಗೆ

ಸಾಗಿದೆ ಒಲವಿನ ಕಡೆಗೆ...

ಬಾನು ಇಲ್ಲಿ ಬಾಗಿದೆ

ಮೇಘಗಳು ತುಸು ನಾಚಿವೆ,

ಒಲವಿನ ಈ ಮೆರವಣಿಗೆಗೆ

ನಿಂತಲ್ಲೇ ತೋರಣವಾಗಿವೆ...

ಆಗಸವು ಖುಷಿಯಲಿ ಮಿಂದಿದೆ

ಮಿಂಚು ನಗುವಾಗಿ ಕಂಡಿದೆ,

ಬಾನಿನ ಈ ಹೊಸ ರೂಪಕೆ

ಇಳೆಯು ಸಾಕ್ಷಿಯಾದಂತಿದೆ...

ನೇಸರ ಮೂಡುವ ಹೊತ್ತಿಗೆ

ಹೊಸದಾದ ಶಕೆಯು ಶುರುವಾಗಿದೆ,

ಭಾನು ಭುವಿಯ ನಡುವೆಯೇ

ಪ್ರೇಮಲೋಕವೇ ತೇಲಿ ನಿಂತಿದೆ...

ಮಾಯಾಬಜಾರು...

ಬದುಕು ಮಾಯಾಬಜಾರು

ಇಲ್ಲಿ ಕನಸುಗಳದೇ ಕಾರುಬಾರು,

ಒಲವು ಕಾಡುವುದು ಹಗಲಿರುಳು

ಮನಸೇ ನೀನಿಲ್ಲಿ ಹುಷಾರು...

ನೆನಪುಗಳ ತೊಟ್ಟಿಲಲಿ

ಮನಸು ಆಗಾಗ ತೂಗುವುದು,

ಕನಸುಗಳ ತೂಕಡಿಕೆಯಲಿ

ಮನಸಿಲ್ಲಿ ಕಂಗಾಲು...

ಭಾವಗಳ ಉಯ್ಯಾಲೆಯಲಿ

ಬದುಕಿಲ್ಲಿ ಜೀಕುತಿಹುದು,

ಅಳುವಿನ ಜೊತೆಗೆ ನಗುವಿರಲು

ಮನಸಿಲ್ಲಿ ಮಗುವಾಗಿಹುದು...

ಇದು ಮಾಯಾಬಜಾರು 

ಇಲ್ಲಿ ಭಾವನೆಗಳ ಕರಾರು,

ಬದುಕಿನ ಮಾರುಕಟ್ಟೆಯಲಿ

ಸಂಬಂದಗಳೇ ಹರಾಜು...

ಬದುಕು...

ಇರುವುದು ಒಂದೇ ಬದುಕು

ಕನಸುಗಳು ಇಲ್ಲಿ ನೂರಾರು,

ಹತ್ತಾರು ಜಂಜಾಟಗಳ ನಡುವೆ

ಉಳಿಯುವುದು ಮಾತ್ರ ಕಣ್ಣೀರು...

ಇರುವುದು ಒಂದೇ ಮನಸು

ಭಾವನೆಗಳು ಮಾತ್ರ ಹಲವಾರು,

ಬದುಕಿನ ಪಯಣದ ನಡುವೆ

ನಿಲ್ದಾಣಗಳಿಲ್ಲಿ ಹತ್ತಾರು...

ಬದುಕಲೇಬೇಕು ಇಲ್ಲಿ

ನೋವು ನಲಿವಿನ ಜೊತೆಗೆ,

ಕಳೆಯಲೇಬೇಕು ಕಾಲ

ಇಷ್ಟ ಕಷ್ಟಗಳ ಜೊತೆಗೆ..

ಕಾಡುವುದು ನೂರು ನೆನಪು

ಭಾರವ ಹೊರಲೇಬೇಕಿಲ್ಲಿ ಮನಸು,

ಸಾಗಲೇಬೇಕು ಬದುಕು

ಕಾಲದ ಕರೆ ಬರುವವರೆಗೂ...

ಗೊಂಬೆಯಾಟ...

ಇರುವುದು ಒಂದೇ ಮನುಷ್ಯ ಜನ್ಮ

ಬಾಳಿ ಬದುಕಬೇಕಿಲ್ಲಿ,

ಅವನ ಕರೆ ಬಂದಾಗ ಎಲ್ಲವ ಬಿಟ್ಟು

ಹೊರಟು ಹೋಗಬೇಕಲ್ಲಿ...

ಅಲ್ಲಿರುವುದು ನಮ್ಮಯ ಮನೆಯೂ

ಇಲ್ಲಿರುವುದು ನಾವು ಸುಮ್ಮನೆಯೂ,

ಈ ಲೋಕದ ಋಣವು ಮುಗಿಯುತಿರಲು 

ಹಿಂತಿರುಗಿ ಹೋಗಲೇಬೇಕಲ್ಲಿ...

ನಾಳೆಯ ಚಿಂತೆಯು ನಮಗಿಲ್ಲಿ

ಅವನ ಲೆಕ್ಕಾಚಾರವೇ ಮೊದಲಿಲ್ಲಿ,

ಅರಳೋ ಹೂವು ಬಾಡುವ ಮುನ್ನ

ಅವನು ಆಟವನೇ ಮುಗಿಸುವಾ...

ನಗುವಿಗೆ ಕಾರಣ ಏನಿಲ್ಲಾ

ನೋವಿಗೆ ಚಿಂತೆಯು ಬೇಕಿಲ್ಲಾ,

ಕಾಲನು ಆಡೋ ಆಟದಲಿ

ಕೈ ಗೊಂಬೆಗಳೇ ನಾವೆಲ್ಲಾ...

ಹುಡುಕಾಟ...

ಆಟ ಬರೀಯ ಹುಡುಗಾಟ 

ಜೀವನವೆಲ್ಲಾ ಬರೀಯ ಹುಡುಕಾಟ,

ಕಾಲದೊಂದಿಗೆ ರಂಪಾಟ

ನೋವು ನಲಿವುಗಳ ಜೊತೆಗೆ ಗುದ್ದಾಟ...

ಬಾಲ್ಯದಲಿ ಸಣ್ಣಪುಟ್ಟ ಕೆಲಸಗಳಲಿ

ಖುಶಿಯ ಹುಡುಕಾಟ,

ಹರೆಯದಲಿ ಕನಸುಗಳ ಬೆನ್ನೇರಿ

ಪ್ರೀತಿ ಸ್ನೇಹದ ಹುಡುಕಾಟ...

ನಡು ವಯಸ್ಸಿನಲಿ ಸಂಸಾರ ಸಾಗರದೊಳಗೆ 

ಜವಾಬ್ದಾರಿಗಳ ಜೊತೆಗೆ ಈಜಾಟ,

ಹಾರಾಟ ಚೀರಾಟ ಮಾಡುತ್ತಾ

ಕಳೆದುಹೋಯ್ತು ಹುಡುಗಾಟ...

ಜೀವನದ ಮುಸ್ಸಂಜೆಯ ಕಾಲಕ್ಕೆ

ನೆಮ್ಮದಿಗಾಗಿ ಹುಡುಕಾಟ,

ಆರೈಕೆ ಓಲೈಕೆ ಮಾಡುತ್ತಾ

ಬಡವಾಯ್ತು ಬದುಕೀಗ...

ಮನ್ವಂತರ...

ಬದುಕಿನ ಬಂಡಿಯ ಯಾಣವಿದು

ಬಲು ಪ್ರಯಾಸದ ಪ್ರಯಾಣವೂ,

ಹತ್ತಾರು ನಿಲ್ದಾಣಗಳಿವೆ ಇಲ್ಲಿ

ನಡುವೆ ನೂರಾರು ತಿರುವುಗಳು...

ಭಾವಗಳ ಸಾಗರದೊಳಗೆ

ನೋವು ನಲಿವುಗಳ ತೆರೆಗಳಿವೆ,

ಕಣ್ಣಳತೆಗೂ ಸಿಗದಷ್ಟು ದೂರದಲಿ

ಬದುಕಿನ ಈ ದಡಗಳಿವೆ... 

ಮನಸೆಂಬ ಆಗಸದಲ್ಲಿ

ಭಾವಗಳ ಬಣ್ಣದ ಚಿತ್ತಾರ,

ಕನಸುಗಳೆಂಬ ಮೋಡದ ಮರೆಯಲಿ

ಬದುಕಲಿ ಒಲವಿನ ಚಮತ್ಕಾರ...

ಒಲವಿನ ಈ ಹಾಡಿನಲಿ

ಕನಸಿನ ಸಾಲುಗಳೇ ಸಾಹಿತ್ಯ,

ಬದುಕಿನಾ ಈ ಸಂತೆಯಲಿ

ಭಾವನೆಗಳದೇ ವ್ಯವಹಾರ...

ಮಂಥನ...

ಕುದಿಯಬೇಡ ಮನವೇ

ಆವಿಯಾಗುತಾವ ಕನಸು,

ಉರಿಯಬೇಡ ಮನವೇ

ಬೂದಿಯಾಗುವಂತೆ ಬದುಕು...

ಸುಟ್ಟು ಹಾಕಬೇಕು ಇಲ್ಲಿ

ಬರೀಯ ಕೆಟ್ಟದ್ದನ್ನು ಮಾತ್ರ,

ಕೋಪ ಮಿತ್ರನಲ್ಲ ಇಲ್ಲಿ

ಸ್ನೇಹಕ್ಕಾಗಿ ಹಾತೊರೆದುಬಿಡಲು...

ಬದುಕು ನಡೆಯುದು ಇಲ್ಲಿ

ಪ್ರೀತಿಯ ಜೊತೆಯಲಷ್ಟೇ,

ತಾಳ್ಮೆ ಶತ್ರುವಲ್ಲ ನಿನಗೆ

ಜೀವ ತುಂಬುವ ಅಮೃತದಂತೆ...

ಉರಿಯುವುದಾದರೆ ಉರಿದುಬಿಡು ಒಮ್ಮೆ

ಜಠರಾಗ್ನಿ ಶಾಂತವಾಗಿಬಿಡಲಿ,

ಕುದಿಯುವುದಾದರೆ ಕುದಿಸಿಬಿಡು ಒಮ್ಮೆ

ಮನದ ಕಲ್ಮಷಗಳೆಲ್ಲಾ ಆವಿಯಾಗಿಬಿಡಲಿ...

ಅಲೆಮಾರಿ...

ಆಸೆಗಳ ಗಂಟುಮೂಟೆ ಕಟ್ಟಿ

ಕನಸುಗಳ ಬೆನ್ನಿಗೇರಿಸಿಕೊಂಡು,

ಊರುಕೇರಿಗಳ ಸುತ್ತಿ ಹೊರಟ

ಬದುಕೇ ನೀನು ಅಲೆಮಾರಿ...

ಸಂಬಂಧಗಳ ಕೋಟೆಯ ಕಟ್ಟಿ

ನೆಮ್ಮದಿಯ ಇಲ್ಲಿ ಪಣಕ್ಕೆ ಇಟ್ಟು,

ಸಂತೋಷವನು ಜಗದಲಿ ಹುಡುಕುತ್ತಾ

ಮೈ ಮರೆತ ಮನಸೇ ಇಲ್ಲಿ ಅಲೆಮಾರಿ...

ದ್ವೇಷನಾ ಮನಸಲಿ ಬಚ್ಚಿಟ್ಟುಕೊಂಡು

ಅಸೂಯೆನಾ ಹರಡುತ್ತಾ ಇಲ್ಲಿ,

ಪ್ರೀತಿನಾ ಹುಡುಕುತಲಿರುವಾ

ಓ ಮನುಜಾ ನೀನು ಅಲೆಮಾರಿ...

ಶ್ರದ್ಧೆಯ ಇಲ್ಲಿ ಗಾಳಿಗೆ ತೂರಿ

ಉಪಕಾರ ಸ್ಮರಣೆಯ ಮರೆತೇಬಿಟ್ಟು,

ಭಗವಂತನ ಹುಡುಕುತ್ತಾ ಹೊರಟಿಹ

ಈ ಲೋಕವೇ ಇಲ್ಲಿ ಅಲೆಮಾರಿ...

ಮನವಿ...

ಓ ನಿದಿರೆಯೇ ನಿನ್ನಲ್ಲಿ ಮನವಿ ಇದೆ

ಹೇಳೊಕು ಜೊತೆಯಲ್ಲಿ ಅಳುಕೂ ಇದೆ...

ಕಣ್ಣ ರೆಪ್ಪೆಯಲಿ ನೀನು ಅಡಗಿರುವೆ

ಕಣ್ಣ ಮುಚ್ಚಿದಾಗ ಯಾಕೋ ಮಾಯವಾಗುವೆ...

ಓ ಕನಸೇ ನಿನ್ನಲ್ಲೊಂದು ಮನವಿ ಇದೆ

ಹೇಳೊಕು ಮನಸೀಗೆ ಮುಜುಗರ ಹೆಚ್ಚಾಗಿದೆ,

ಕಾಡೋಕು ನಿನಗೆ ಹೊತ್ತು ಗೊತ್ತಿಲ್ಲವೇ

ನನ್ನನ್ನೇ ನಾ ಮರೆತಾಗ ಬಡಿದೆಬ್ಬಿಸುವೆ...

ಓ ನೆನಪೇ ನಿನ್ನಲ್ಲೊಂದು ಮನವಿ ಇದೆ

ಒಂದೊಮ್ಮೆ ನೀನು ಸುಮ್ಮನಿರಬಾರದೇ,

ನೀನು ಮೌನ ಮುರಿದಾಗಲೆಲ್ಲಾ ಇಲ್ಲಿ ನೋವಿದೆ

ಕಣ್ಣಿಂದ ನಿದಿರೆಯೂ ಕೈ ಜಾರಿದೆ...

ಓ ಬದುಕೇ ನಿನಗೊಂದು ಮನವಿಯಿದೆ

ಕಾಲಕ್ಕೆ ನೀನಿಲ್ಲಿ ತಲೆ ಬಾಗಬೇಕಿದೆ,

ಕಾಲದ ಜೊತೆಗಿನ ಗುದ್ದಾಟದಲಿ

ನೀನಿಲ್ಲಿ ಕಲಿಯೋದು ಬಹಳಷ್ಟಿದೆ...

ಮೂರರೊಳಗೆ ಬಾಳು...

ಮೂರು ದಿನದ ಬಾಳು 

ತಪ್ಪದಿಲ್ಲಿ ಗೋಳು,

ಅವನು ಆಡಿಸುವ ಆಟದಂತೆ

ನಮ್ಮದಿಲ್ಲಿ ಬಾಳು...

ಮೂರು ದಿನದ ಪಯಣ

ನೂರು ಅವಘಡಗಳಲ್ಲಿ,

ಗಮ್ಯ ಸೇರುವ ಮುನ್ನ

ಹಲವಾರು ತಿರುವು ಇಲ್ಲಿ...

ಬದುಕು ಮೂರು ಸಾಲಿನ ಕವಿತೆ

ಸ್ನೇಹ ಪ್ರೀತಿ ಪ್ರೇಮದ ಜೊತೆಗೆ,

ಪ್ರಾಸ ಭಾಸವೆಲ್ಲಾ ಇಲ್ಲಿ

ಭಾವಗಳ ಮಿಲನದ ಜೊತೆಗೆ...

ಬದುಕು ಮೂರು ದಿನದ ಸಂತೆ 

ಇಲ್ಲಿಹುದು ಚಿಂತೆಗಳ ಕಂತೆ,

ಹೊತ್ತು ಸಾಗಬೇಕು ಇಲ್ಲಾ ಬಿಟ್ಟು ಹೋಗಬೇಕು

ಜಗದ ಋಣವು ಮುಗಿಯೋ ಮುಂಚೆ...

ಬೃಂದಾವನ...

ಒಂದು ಸಣ್ಣ ನೆನಪು ಸಾಕು

ಮತ್ತೆ ಮತ್ತೆ ನಿನ್ನ ಪ್ರೀತಿ ಮಾಡಲೂ,

ಒಂದೇ ಒಂದು ಮಾತು ಸಾಕು

ಒಲವ ಆಗಸಕೆ ಹಾರಲೂ...

ನಿನ್ನದೊಂದು ಮೌನ ಸಾಕು

ಹೃದಯ ಕರಗಿ ಕಣ್ಣೀರಾಗಲೂ,

ನಿನ್ನದೊಂದು ನಗುವು ಬೇಕು

ನನ್ನ ಮನವು ಹಗುರಾಗಲೂ...

ನಿನ್ನೊಳು ಹುಸಿ ಕೋಪವಿರಬೇಕು

ನಾನು ಇಲ್ಲಿ ಮಗುವಾಗಲೂ,

ನಿನ್ನ ತುಂಟತನವೂ ಬೇಕು

ನಾನು ಪ್ರೇಮಿಯಾಗಿ ಬೆರೆಯಲು...

ನೀನು ಸದಾ ನಗುತಲಿರಬೇಕು

ಬದುಕು ಬೃಂದಾವನವಾಗಲೂ,

ನೀನು ರಾಧೆಯಾಗಿರಲು ಇಲ್ಲಿ

ನಾನು ನಿನ್ನೊಲವಿಗೆ ಮಾಧವ...

ಚಂದ್ರಮ...

ಆಗಸದ ಅಂಗಳದಿ

ಚಂದ್ರಮನು ಏಕಾಂಗಿ,

ಮೋಡಗಳ ತೊಟ್ಟಿಲಲಿ

ಮಲಗಿರುವ ಹಾಯಾಗಿ...

ತಾರೆಗಳ ಬಟ್ಟಲಲಿ

ಇಣುಕುತಿಹ ಜೊತೆಗಾಗಿ,

ಸಿಕ್ಕರೂ ಸಿಗಬಹುದೇ

ಪ್ರೀತಿಯ ಸಂಗಾತಿ...

ಮೋಡಗಳ ಮರೆಯಲ್ಲಿ

ಆಡುತಿಹ ಕಣ್ಣಮುಚ್ಚಾಲೆ,

ಕಾಡಿಸುತ್ತಾ ಇಳೆಯನ್ನೇ

ಪ್ರೇಮಿಯಾ ಗುಂಗಲ್ಲೇ...

ಚುಕ್ಕಿಗಳ ಜೊತೆ ಸದಾ ವಿರಹಿಯೂ

ಅಳುವಾಗ ಎಲ್ಲೆಲ್ಲೂ ಕತ್ತಲೆಯೂ,

ನಗುವಾಗ ಜಗದಿ ಬೆಳದಿಂಗಳು

ಇವ ಲೋಕಕ್ಕೆ ಅಮರ ಪ್ರೇಮಿಯೂ...

ಮಾಯಗನ್ನಡಿ...

ಹಗಲು ಜಾರಿ ಇರುಳು ಏರಿದಂತೆ

ಮನಸು ಈಗ ಮಾಯೆಯೊಳು ಬಂಧಿ,

ಬೆಳಕು ಕರಗಿ ಅಂಧಕಾರದೊಳು ಜಾರಿದಂತೆ

ಮನಸು ಇಲ್ಲಿ ಮೌನದಲೇ ಕರಗಿಹೋಗಿದೆ...

ಸಮಯದ ಚಕ್ರ ಉರುಳಿ ಸಾಗುತಿರಲು

ಮನೋ ರಥವು ಯಾಕೋ ನಿಂತು ಸಾಗಿದೆ,

ಗುರುವಿಲ್ಲದ ಗಮ್ಯ ಗುರಿಯಿರದಾ ಪಯಣ

ಮನಸೆಲ್ಲೋ ಈಗ ಮರೆಯಾಗಿದೆ...

ಮೆರೆಸೋದು ಕಾಲ ಮರೆಸೋದು ಕಾಲ

ಮತ್ತೆಲ್ಲಾ ಶೂನ್ಯ ಈ ಜಗದೊಳಗೇ,

ಮನಸೀಗ ಮೌನಿ ಎದೆಯ ನೂರು ಭಾವಕೇ

ತುಸು ಹನಿಯ ಸಿಂಚನ ಸಿಗಲಾರದೇ...

ಪ್ರತಿ ಕ್ಷಣವು ಮರಣ ಮರು ಗಳಿಗೆ ಜನನ

ಇದು ಮನಸಿನ ನಿತ್ಯ ನಿರಂತರ ಯಾತ್ರೆಯೂ,

ಮೂರು ಗುಣಗಳ ಜೊತೆಗೆ ನೂರು ಮುಖಗಳ ಹೊತ್ತು

ಮಾಯೆಯೊಳಗೊಂದು ಮಾಯೆಯ ಹುಡುಕುವುದೇ ಮನಸು...

ಕುರುಕ್ಷೇತ್ರ...

ಪ್ರೀತಿಯಿದು ಸ್ನೇಹವಿದು

ಬದುಕಿನಾ ಪರಿಪಾಠವಿದು,

ಬಂಧಗಳ ಸಂಬಂಧಗಳ ಸರಪಳಿಯೊಳಗೆ

ಜೀವನವಿದು ಸಂಘರ್ಷವೂ...

ನಿನ್ನೆಗಳ ನೆನಪು ಇದು

ನಾಳೆಗಳ ಕನಸು ಇದು,

ಈ ಲೋಕದಾ ಪಯಣವಿದು

ಸುಖ ದುಃಖಗಳ ಹೋರಾಟವೂ...

ತಪಸ್ಸಿದು ಮನಸೊಳಗೆ

ಭಾವಗಳ ಮಂಥನವೂ,

ನೂರಾರು ಗೊಂದಲದೇ

ಮನಸ್ಸಿಲ್ಲಿ ಕುರುಕ್ಷೇತ್ರವೂ...

ಧರ್ಮವಿದೆ ಇಲ್ಲಿ ಅಧರ್ಮವಿದೆ

ಮನಸೊಳಗೆ ಸತ್ಯವಿದೆ,

ಆಸೆ ಆಕಾಂಕ್ಷೆಗಳ ಸುಳಿಯೊಳಗೆ

ಬದುಕೇ ಇಲ್ಲಿ ಮಹಾಭಾರತ...

ಮೇಲೊಬ್ಬನಿರುವ...

ನೂರಾರು ರೂಪ ಹಲವಾರು ಹೆಸರು

ಈ ಸೃಷ್ಠಿಯೊಳಗೆ ನಿನ್ನ ಕಾಣಲು,

ಜಗವೇ ನೀನಾಗಿರಲು ನೋಡಲಿಲ್ಲ ಇಲ್ಲಿ

ನಾನು ನನ್ನದೆಂಬ ಹಮ್ಮಿನೊಳಗೆ...

ನೂರಾರು ಪೂಜೆ ವೃತಗಳೆಲ್ಲಾ ನಿನ್ನ ಹೆಸರಲಿ

ಪ್ರೀತಿ ಇರಲೇ ಇಲ್ಲ ಅಲ್ಲಿ ನಿನ್ನ ಸ್ಮರಣೆಯೊಳು,

ಭಕ್ತಿ ಸೋತು ಹೋಯ್ತು ಅಡಂಭರದೊಳು

ಮನದ ಬಾಗಿಲ ತೆರೆಯಲಿಲ್ಲ ನಾನೆಂಬ ಹುಚ್ಚಿನೊಳು...

ಬೆಳಗಿ ನಿಂತೆ ದೀಪವೊಂದ ಕತ್ತಲೆಯೊಳು 

ಮನದ ಪರದೆ ಸರಿಸ ಮರೆತೆ ಅಲ್ಲಿ ನಾನು,

ಮನದ ತುಂಬಾ ಕತ್ತಲೆ ಇರಲು ನಿನ್ನ ಹುಡುಕಿದೆ

ನಿನ್ನ ಗೈರು ಕತ್ತಲೆಯೆಂಬ ಸತ್ಯ ಮರೆತೇ ಹೋಗಿದೆ...

ಕಾಯಲೆಂದೇ ನೀನಿರುವೆಯೆಂದು ಸುಮ್ಮನಿದ್ದೆ ನಾನು

ಕರ್ಮದೊಳಗೆ ನೀನಿರುವೆಯೆಂಬ ಸತ್ಯ ಮರೆತು,

ಪರೀಕ್ಷೆ ನಿನ್ನದು ಪರಿಹಾರ ನೀನೆಂಬ ಜಂಭದೊಳು

ನನ್ನತನವ ಮರೆತು ಮುಳುಗಿ ಹೋದೆ ಅಂಧಕಾರದೊಳು...

ಚುಕ್ಕಿ...

ಒಲವಲ್ಲೂ ಕೂಡ ನೋವಿಹುದು ಇಲ್ಲಿ

ಆ ನೋವು ಕೂಡ ಹಿತವಾಗಿಹುದಲ್ಲ, 

ಬಾಳೆಂಬ ಬನದಿ ಒಲವೆಂಬ ಲತೆಯೊಳು

ಪ್ರೀತಿ ಹೂವಾಗಿ ಅರಳಿ ನಗುತಿರಲೂ...

ಕನಸೊಂದು ಇಲ್ಲಿ ಜೊತೆಯಾಗಿ ಇರಲೂ

ಮನಸೊಂದು ಮಗುವಂತೆಯೇ,

ಹಗಲಿಲ್ಲಿ ನಗಲು ಇರುಳ ಕನವರಿಕೆ

ಇರುಳ ತುಂಬೆಲ್ಲಾ ಕನಸುಗಳ ಬಾಯಾರಿಕೆ...

ಯಾರೆಲ್ಲೇ ಇರಲಿ ಊರೆಲ್ಲಾ ನಗಲಿ

ಮನಸೊಂದೇ ಕನವರಿಸಿದೇ,

ಒಲವ ಧ್ಯಾನದೊಳು ಈಗ

ಈ ಬದುಕಿಲ್ಲಿ ತಪಸ್ಸಾಗಿದೆ...

ನೂರು ನೋವುಗಳ ದಾಟಿ

ನಲಿವುಗಳ ತಂತಿಯ ಮೀಟಿ,

ಒಲವೆಂಬ ಚುಕ್ಕಿ ಮಿನುಗುತಿರಲು

ಮನಸಿಲ್ಲಿ ಅನಂತ ಆಕಾಶವು...

ಬುದ್ಧನೊಲವು...

ಬುದ್ಧನಾಗಲಾರೆ ಈಗ

ಪ್ರೀತಿಯಲಿ ಬಿದ್ದ ಮೇಲೆ,

ತ್ಯಜಿಸಲಾರೆ ಮನದ ಆಸೆಗಳ

ನಿನ್ನೊಲವ ತುಂಬು ಹಂಬಲದೀ...

ಕನಸುಗಳ ಕೊಲ್ಲಲಾರೆ ಮನದೇ

ನೆನಪುಗಳ ಮರೆತುಬಿಡಲು,

ನಿನ್ನೆಗಳ ಕಸಿದುಕೊಳ್ಳಲಾರೆ 

ನೆನಪುಗಳ ಮಡಿಲಿನಿಂದ...

ಹುಸಿಯ ನುಡಿಯಲಾರೆ ಒಲವೇ

ಜಗವ ಮೆಚ್ಚಿಸಲು ಇಲ್ಲಿ,

ಆತ್ಮಸಾಕ್ಷಿಗಿಂತ ಮತ್ತೇನು ಬೇಕು

ನಮ್ಮೊಲವ ಪಯಣದೊಳಗೆ...

ಪ್ರೀತಿಗಿಂತ ದೊಡ್ಡ ಅಹಿಂಸೆಯಿಲ್ಲ

ನಿನ್ನೆ ಇಂದು ನಾಳೆಗಳಲೂ ಕೂಡ,

ಪರಿಪೂರ್ಣ ಪ್ರೇಮದಲ್ಲಿ ಹಿಂಸೆಯಿಲ್ಲ

ಒಲವು ಇಲ್ಲಿ ಬದ್ಧತೆಯಾಗಿಹುದಲ್ಲ...

ಕನಸು...

ಒಲವಿನ ಹೂರಣ ನೀನು

ಬದುಕಿಗೆ ತೋರಣವೂ,

ಓ ಕನಸೇ ಬದುಕಲಿ ನೀನು

ಚಂದ್ರ ಚೆಲ್ಲಿದ ಬೆಳದಿಂಗಳು...

ಆಗಸಕೆ ಏಣಿಯ ಇಟ್ಟು

ಮನದೊಳಗೆ ಆಸೆಯನಿಟ್ಟೆ,

ಓ ಕನಸೇ ಮಾಯಾವಿ ನೀನು

ಭ್ರಮೆಯೊಳಗೆ ಸಿಲುಕಿಸಿಬಿಟ್ಟೆ...

ನೆನಪುಗಳ ಕೂಡಿಸಿ ಇಟ್ಟು

ಮನಸೊಳಗೆ ಕಚಗುಳಿ ಇಟ್ಟೆ,

ಕಾಣದ ಲೋಕಕೆ ಲಗ್ಗೆಯನಿಟ್ಟು

ಕಾಡುವ ಕಿನ್ನರ ನೀನಾದೆ...

ಜೊತೆಗಿರೆ ನೀನು ಬಾಳಲಿ

ಬದುಕಿಲ್ಲಿ ಪ್ರೇಮಲೋಕ,

ಕರಗಿ ಹೋದರೆ ಕನಸೇ ನೀನು

ಕತ್ತಲು ಇಲ್ಲಿ ಬಾಳಿನ ಯಾತ್ರೆ...

ಭರವಸೆ...

ಬದುಕು ನೀಲಿ ನೀಲಿ ಆಕಾಶ

ಹಾರುವ ಹಕ್ಕಿಯಿಲ್ಲಿ ಮನಸೀಗ,

ಕನಸುಗಳ ರೆಕ್ಕೆಯ ಬಿಚ್ಚುತ್ತಾ

ನಾಳೆಗಳ ಹುಡುಕಾಟ...

ಬದುಕು ಅನಂತ ಅವಕಾಶ

ನಿನ್ನೆಗಳ ನೆನಪ ಮರೆತಾಗ,

ನಗುವಿನ ಪುಟವ ತೆರೆದಾಗ

ನಾಳೆಗಳ ಪಯಣ ಸುಲಲಿತ...

ಬದುಕು ಸುಂದರ ಹೂದೋಟ

ನಿನ್ನೆಗಳ ಕಹಿಯ ಮರೆತಾಗ,

ನಗುವಿನ ತೋರಣ ಕಟ್ಟಿದರೆ

ನಲಿವಿನ ಹೂವುಗಳಲ್ಲಿ ಅರಳುವವು...

ಬದುಕು ಇಲ್ಲಿ ಸಾಗರವೂ

ಪರೀಕ್ಷೆಗಳ ಆಗರವೂ,

ಅರಿಯದೆ ಬರುವ ಪ್ರಶ್ನೆಗಳಿಗೆ

ತಾಳ್ಮೆಯ ಹೆಜ್ಜೆಗಳೇ ಉತ್ತರವೂ...

ಮೌನರಾಗ...

ಮಾತಾಡು ಬಾ ಓ ಮೌನವೇ

ಮುದ್ದಾಡು ಬಾ ನೀನೀಗಲೇ,

ನೆನಪುಗಳು ಕಾಡುತಿವೆ ನೀನಿಲ್ಲದೇ

ಕನಸುಗಳು ಕರಗಿವೆ ಮಾತಿಲ್ಲದೇ...

ಉಸಿರಿಲ್ಲಿ ಎಣಿಸುತಿದೆ ಸದ್ದಿಲ್ಲದೇ

ಎದೆಬಡಿತ ನೀನೇ ಓ ಮೌನವೇ,

ಬರುತಿರುವೆ ನೀನು ಬರೀ ಕನಸಲೇ

ಮರುಳೀಗ ಮನಸು ಬರೀ ನೆನಪಲೇ...

ಶುರುವಾಯ್ತು ಸ್ನೇಹ ಮಾತಿಂದಲೇ

ಹೊಸದಾದ ಪ್ರೀತಿ ಮನಸಿಂದಲೇ,

ಖಾಲಿಯಿಲ್ಲಿ ಮನಸು ನೀನಿಲ್ಲದೇ

ಮಾತಾಗು ಸಾಕು ಓ ಮೌನವೇ...

ನಾಳೆಗಳ ಕನಸು ಅದು ನಿನ್ನಿಂದಲೇ

ಮಾತಾಗು ಮುನಿಸೇ ನೀನೀಗಲೇ,

ಅಪ್ಪಿಕೊಂಡಿದೆ ಮನಸು ಒಲವಿಂದಲೇ

ಒಪ್ಪಿಕೊಳ್ಳೊಣ ಬಾ ಈ ಮೌನದೇ...

ಕರ್ಮಣ್ಯೇ ವಾಧಿಕಾರಸ್ತೇ...

ಅಹಂಕಾರವಿಲ್ಲಿ ಕ್ಷಣಿಕ ಕೇಳು ಮನುಜಾ

ನಿನ್ನ ಕರ್ಮಗಳಿಗೆ ನೀನೇ ಹೊಣೆಯು ಇಲ್ಲಿ,

ಪಾಪ ಪುಣ್ಯವೆಲ್ಲಾ ಬರೀಯ ಕಥೆಯೂ ಅಲ್ಲಾ

ನಿನ್ನ ಕರ್ಮಗಳೆಲ್ಲಾ ಮರಳಿ ಬರುವುದಿಲ್ಲಿ...

ಕಾಲ ಕಲಿಸೋ ಪಾಠ ಅಲ್ಲಾ

ಅದು ಕಾಲ ಕೊಡುವ ಏಟು,

ಮನುಜ ನೀನು ಆಡೋ ಆಟಕ್ಕಿಂತ

ತುಂಬಾ ಘೋರ ಕಾಲ ಆಡಿಸೋ ಆಟ...

ಮೂಡ ಮನವೇ ಕೇಳು ಇಲ್ಲಿ ಸ್ವಲ್ಪ

ನಿನ್ನ ಕೋಪ ತಾಪ ಎಲ್ಲಾ ಬರೀಯ ಶೂನ್ಯವಿಲ್ಲಿ,

ಈ ಸೃಷ್ಠಿಯೊಳಗೆ ನೀನೊಂದು ಅಣುವು ಅಷ್ಟೇ

ನಿನ್ನ ಹಾರಾಟವೆಲ್ಲಾ ಬರೀಯ ವ್ಯರ್ಥವಷ್ಟೇ...

ಕಾಲ ಚಕ್ರದೊಳಗೆ ನೀನಿಲ್ಲಿ ಕರ್ಮಯೋಗಿ

ನಿನ್ನ ಕರ್ಮಫಲಗಳ ಜೊತೆ ನೀನು ಬಂಧಿಯಿಲ್ಲಿ,

ಎಲ್ಲಾ ಕೆಟ್ಟ ಕರ್ಮಗಳಿಗೂ ಶಿಕ್ಷೆಯೂ ಇಹುದು ಇಲ್ಲೇ

ನಿನ್ನ ಕರ್ಮ ಚಕ್ರದೊಳಗೆ ಬಂಧಿಯಾಗದಿರು ನೀನು...

ಬದುಕು...

ಎದೆಗೂಡಿನ ದನಿಯೂ ಸಂಗೀತವಿಲ್ಲಿ

ಭಾವನೆಗಳು ಬರೆವ ಸಾಹಿತ್ಯಕೆ,

ಬದುಕೆಂಬುದಿಲ್ಲಿ ಸಂಗೀತ ಶಾಲೆ

ನೋವು ನಲಿವುಗಳ ರಾಗತಾಳದೊಳು...

ಬದುಕು ಇಲ್ಲಿ ನಾಟಕ ಶಾಲೆ

ವಿಧಿಯೂ ಗೀಚಿದ ಕಥೆಯೊಳು,

ಅಭಿನಯಿಸಲೇಬೇಕು ಜಗದ ರಂಗಮಂದಿರದೊಳು

ನಾನು ನೀನೆಂಬ ಹಮ್ಮು ತೊರೆದು...

ಕಾಲವೆಂಬ ಹರಿವ ನೀರೊಳು

ಬದುಕು ಪುಟ್ಟ ಹಾಯಿದೋಣಿ,

ಹುಟ್ಟು ಹಾಕಿದಷ್ಟು ಕಷ್ಟವಿಹುದು

ದೂರ ತೀರವ ಸೇರಲು...

ಬದುಕು ಇಲ್ಲಿ ಚದುರಂಗದಾಟ

ಆಸೆ ಆಕಾಂಕ್ಷೆಗಳ ನಡುವಿನ ಓಟದೊಳು,

ಬಾಂಧವ್ಯಗಳ ಬಂಧನದೊಳಗೆ

ಬದುಕಿದು ಪರಿತಾಪವೂ...

ಒಲವ ಗೀತೆ...

ಒಲವೇ ನೀನಿಲ್ಲಿ ಮಂದಾರವು

ಕನಸ ಕಚಗುಳಿಯೊಳು ಬಂಗಾರವೂ,

ಮೌನದ ಮರೆಯೊಳಗೆ ನೀ ಬೆಳದಿಂಗಳು

ನಗುವಾ ನಯನದೊಳು ನೀ ಚುಕ್ಕಿಯೂ...

ನೀನೊಂದು ರಾಗ ಈ ಎದೆಗೂಡಲಿ

ಕಣ್ಣ್ ಮುಚ್ಚಿ ತೆರೆದಾಗ ಆನಂದವೂ,

ಸಂಗೀತ ಬಾಳೆಲ್ಲಾ ನಿನ್ನ ನೆನಪಲಿ

ಸಾಹಿತ್ಯ ಬದುಕಿಲ್ಲಿ ನಿನ್ನ ಜೊತೆಯಲಿ...

ಓ ಒಲವೇ ನೀನು ಸಂಗಾತಿಯೂ

ಪ್ರತಿಕ್ಷಣದ ಕನವರಿಕೆ ನಿನ್ನ ಸಾಂಗತ್ಯವೂ,

ನೀನಿಲ್ಲಿ ಬಂದು ಜೊತೆಯಾಗಲು

ಬದುಕೆಂಬ ದೋಣಿ ದಡ ಸೇರಿಹುದು...

ಜೀವಕ್ಕೆ ನೀನು ಉಸಿರಂತೆಯೂ

ಪ್ರತಿ ತುಡಿತಕ್ಕೂ ಇಲ್ಲಿ ನೀ ಮಿಡಿತವೂ,

ಬದುಕೆಂಬ ಬಾನಲ್ಲಿ ನೀ ಸೂರ್ಯನೂ

ನರನಾಡಿಗೆಲ್ಲಾ ಚೈತನ್ಯವೂ...