31 December, 2018

ಭಾವ ಬಂಧನ...

ಬರಿದೇ ಬರವಣಿಗೆ ಅಲ್ಲಾ
ಇದು ಭಾವದ ಮೆರವಣಿಗೆ,
ಸ್ವಲ್ಪ ಕಹಿ ನೋವು
ಮತ್ತೆಲ್ಲಾ ಸಿಹಿ ಜೇನು...

ಬರೆಯ ಕನಸುಗಳೇ ಇಲ್ಲಿ
ಕೆಲವಂತೂ ಬರೆ ಎಳೆದ ನೆನಪುಗಳೇ,
ನೆನಪುಗಳ ಮೆರವಣಿಗೆ ಅಲ್ಲಾ
ಇದು ಹೃದಯಕ್ಕೆ ಕಚಗುಳಿಯೂ...

ನೋವಿಲ್ಲಿ ನಗುವಾಯ್ತು
ನಗುವೊಂದೇ ಕನಸಾಯ್ತು,
ಕಣ್ಣೀರಿಗೆ ಕಸ ಕಾರಣವಿಲ್ಲಿ
ಬದುಕೆಂಬ ಮೂರು ದಿನದ ಜಾತ್ರೆಯೊಳಗೆ...

ಹೃದಯಕ್ಕೆ ನಾಟಲೇ ಇಲ್ಲ
ಮನಸಿನ ಗಾಯದ ನೋವು,
ಬದುಕಿಲ್ಲಿ ನಾಟಕವಂತೆ
ಜಗವೆಂಬೊ ರಂಗಮಂದಿರದೊಳಗೆ...

ಹುಟ್ಟೊದೇ ಅಳುವಿನ ಜೊತೆಗೆ
ನಡುವೆ ನಗುವ ಹುಡುಕಬೇಕಿಲ್ಲಿ,
ಹುಡುಕಾಟ ಮುಗಿಸೋವಾಗ
ಸಾವೆಂಬ ಜವರಾಯ ಅಳುವ ಕರುಣಿಸುವ...

22 December, 2018

ಓ ಮನಸೇ...

ಬಣ್ಣವಿಲ್ಲದೆ ಗಂಧವಿಲ್ಲದೆ
ಕಾಡೋ ಮಾಯೆ ಓ ಮನಸೇ,
ಹೊತ್ತು ಇಲ್ಲದೆ ಗೊತ್ತೇ ಆಗದೆ
ಓಡೋ ಮಾಯೆ ನೀ ಮನಸೇ...

ಒಮ್ಮೆ ನೀರು ಮತ್ತೆ ಗಾಳಿಯಂತೆ
ನೀನು ಇಲ್ಲಿ ಚಂಚಲೆ ಓ ಮನಸೇ,
ತೂಕವಿಲ್ಲದ  ಆಕಾರವಿಲ್ಲದ
ಹಿಡಿಯೋಕು ಆಗದ ಮಾಯೆ ನೀನು...

ಹೆಣ್ಣು ಅಲ್ಲದಾ ಗಂಡು ಅಲ್ಲದಾ
ಭಾವ ನೀನು ಓ ಮನಸೇ,
ಹೆಣ್ಣಾಗಿ ಕಾಡುವೆ ಒಮ್ಮೆ ಇಲ್ಲಿ
ಗಂಡಾಗಿ ಕಾಯುವೆ ಮತ್ತೆ ನೀನು...

ಒಮ್ಮೆ ನೋವು ಮತ್ತೆ ನಲಿವು
ಬದುಕೆಲ್ಲಾ ನಿನ್ನ ಪರಿಹಾಸ್ಯ,
ಪ್ರೀತಿಯಲ್ಲಿ ಸ್ನೇಹದಲ್ಲಿ
ಬದುಕ ನಡೆಸುವಾ ಮಾಯೆ ನೀನು...

ಹೆಗಲಾಗು ನೀನು ಸಖನಂತೆ
ಕಾಡಬೇಡ ಕರಗೋ ಕನಸಿನಂತೆ,
ಬೇಕು ನೀನು ಪ್ರೀತಿ ತೋರುವ ಸಖಿಯಂತೆ
ಮೆರೆಸು ಇಲ್ಲಿ ನನ್ನೆದೆಯೊಳಗೆ ನೆನಪುಗಳ ಸಂತೆ...

15 December, 2018

ಸಿಪಾಯಿ...

ಭಾರತ ಮಾತೆಯಾ ಹೆಮ್ಮೆಯ ಕುವರ
ಗಡಿಯ ಕಾಯುವಾ ಓ ಯೋಧ,
ದಿಕ್ಕು ದಿಕ್ಕುಗಳಲ್ಲೂ ಶೌರ್ಯ ಮೆರೆಯುತ್ತಾ
ಮನೆ ಮನಗಳ ಕಾಯುವ ಹಮ್ಮೀರ...

ಗಡಿಗಳಿಗೆ ಬೇಲಿಯಾಗುವ ಓ ಜೀವವೇ
ಜಾತಿ ಮತಗಳ ಹಂಗು ನಿನಗಿಲ್ಲಾ,
ಕೋಟಿ ದೇವರು ಇಲ್ಲಿದ್ದರೂ
ದೇಶವೊಂದೇ ದೇವರು ನಿನಗಿಲ್ಲಿ...

ಕೋಟಿ ಮಂತ್ರಗಳ ಭಜಿಸುತಿವೆ
ನೀನು ಕಾಯುವಾ ಜೀವಗಳು,
ಆದರೂ ನೀನು ಜಪಿಸೋ ಮಂತ್ರವೊಂದೇ
ಜಯಹೇ ಭಾರತ ಮಾತೆ...

ಹಿಮವನ್ನೇ ಹೊದ್ದು ನಿಂತರೂ ನೀ
ಬೆಚ್ಚಗೆ ಮಲಗಿಸುವೆ ನಿನ್ನವರ,
ಹೆತ್ತವ್ವನ ಹರಕೆಯ ಜೊತೆಗೆ
ಕೋಟಿ ಹಾರೈಕೆಗಳು ನಿನಗಿದೆಯಿಲ್ಲಿ...

ಸಾಮಾನ್ಯ ನೀನು ಅಸಾಮಾನ್ಯನಾಗಿ
ಬೆಳಗಿಹೆ ಶೌರ್ಯದ ದೀಪವ ತಾಯಿ ನಾಡಿಗೆ,
ನೀ ಕತ್ತಲ್ಲಲ್ಲೇ ಇದ್ದರೂ ಕೂಡ
ಸ್ವಾತಂತ್ರ್ಯದ ಬೆಳಕ ನೀಡುವೆ ನಾಡಿಗೆ...

08 December, 2018

ಓ ನೆನಪೇ...

ನಾ ನಿನ್ನ ಮಡಿಲೊಳಗೆ
ಮಗುವಂತೆ ಮಲಗಿರಲು,
ನೀನಪ್ಪಿ ಹಿಡಿದಿರುವೆ
ಪ್ರೀತಿಯ ಒಲವ ಅಪ್ಪುಗೆಯಂತೆ...

ಓ ನೆನಪೇ ನೀನೆಷ್ಟು ಸುಂದರ
ತಾಯ ಪ್ರೀತಿಯಂತೆ ಸುಮಧುರ,
ಒಮ್ಮೊಮ್ಮೆ ನೀ ನಿಷ್ಠುರ
ಅಪ್ಪನ ಗದರುವಿಕೆಯಾ ರೀತಿ...

ಒಮ್ಮೊಮ್ಮೆ ನೀನಿಲ್ಲಿ ಸೋದರ
ಜವಾಬ್ದಾರಿಗಳಿಗೆ ಹೆಗಲಿನಂತೆ,
ಮತ್ತೊಮ್ಮೆ ನೀ ಸೋದರಿ
ವಾತ್ಸಲ್ಯದಾ ಗಣಿಯಂತೆ...

ನೀನಿಲ್ಲಿ ಪ್ರೀತಿಯಾ ಸ್ನೇಹಿತ
ತುಂಟಾಟಗಳ ಆಗರ,
ಒಮ್ಮೆ ನೀನಿಲ್ಲಿ ಅವಳ ರೀತಿ
ಸದಾ ಹಿಂಬಾಲಿಸೋ ಪ್ರೀತಿಯ ನೆರಳು...

ನೀನಿಲ್ಲದೆ ಬದುಕಿನೊಳು ಕನಸಿಲ್ಲ
ಕನಸುಗಳಿಗೆ ನೀನೇ ಎಲ್ಲಾ,
ಬದುಕಿನೊಳು ಭರವಸೆಯು ನೀ
ನಿನ್ನೆ ನಾಳೆಗಳೊಳಗಿನ ಹಪಾಹಪಿಯೂ...

02 December, 2018

ಜನ್ಮ...

ನಾನಂದು ಅತ್ತಿದ್ದೆ ಕತ್ತಲೆಯೊಳಗೆ
ಜಗವೆಲ್ಲಾ ನಕ್ಕಿತ್ತು ಬೆಳಕಿನೊಳಗೆ,
ಬ್ರಹ್ಮ ಬರೆದ ಅನುಬಂಧ
ಯಾರು ತಿಳಿಯದಂತೆ ಶುರುವಾಗಿತ್ತು...

ಯಾವ ಲೋಕದಾ ಪಯಣ
ಅಲ್ಲಿ ಅಂದು ಮುಗಿದಿತ್ತೋ,
ಭೂಮಿಯ ಮೇಲಿನ ಯಾತ್ರೆ
ಇಲ್ಲಿ ಹೊಸತಾಗಿ ಆರಂಭವಾಗಿತ್ತು..

ಮತ್ತೆಂದೂ ಅಳಲಿಲ್ಲಾ ನಾ ಕತ್ತಲೆಯೊಳಗೆ
ಜಗವಿಲ್ಲಿ ನಗಲೂ ಇಲ್ಲ ನನಗಾಗಿ,
ನಾನು ನಕ್ಕಾಗ ನನ್ನೊಡನೆ ನಕ್ಕಿತ್ತು
ನಾನು ನೋವೆಂದಾಗ ಅತ್ತಿತ್ತು ಅಲ್ಲೊಂದು ಹೃದಯಾ..

ಭೂಮಿಯಾ ಮೇಲಿನ ಪಯಣಕ್ಕೆ
ಮೊದಲ ಸಹ ಪ್ರಯಾಣಿಕಳು ಅವಳೇ,
ಮಧುರ ಬಾಂಧವ್ಯಕೆ ಮುನ್ನುಡಿಯು ಇವಳಿಲ್ಲಿ
ಕರುಳಿನ ಈ ಬಂಧ ಕಣ್ಣೀರಿನ ಸಂಬಂಧ...

ಅವಳಿಗಾಗಿ ನಗಲಿಲ್ಲಾ ನನಗಾಗಿಯೇ ಎಲ್ಲಾ
ನನ್ನ ನಗುವಲ್ಲೇ ಕಂಡಳೂ ಜಗವನ್ನೇ,
ಮುಂದಿನಾ ಪಯಣ ನನಗಂತೂ ತಿಳಿದಿಲ್ಲಾ
ಇದ್ದರೇ ಇರಲಿ ಈ ಗರ್ಭದೊಳಗೆ ಮುಂದೊಂದು ಜನ್ಮ...

28 November, 2018

ನೆನಪು...

ಗುದ್ದಾಡಿ ಗೆದ್ದವರಿಲ್ಲಾ
ನೆನಪುಗಳ ಜಂಜಾಟದಲಿ,
ಗೆದ್ದವರು ಕಳೆದೊದ್ರಲ್ಲಾ ಗೆಳತಿ
ಸೋತವರು ಪ್ರೇಮಿಗಳೇ ಎಲ್ಲಾ...

ನೆನಪುಗಳ ಕಾಳಗದೊಳಗೆ
ಕರಗಿ ಹೋದ ಕನಸುಗಳೆಷ್ಟೋ,
ಮಾತುಗಳೇ ಮರೆತುಹೋಗಿ
ಮೌನವಾದ ಬದುಕುಗಳೆಷ್ಟೋ...

ಒಮ್ಮೆ ಸ್ನೇಹವಾಗಿ ಮತ್ತೆ ಪ್ರೀತಿಯಾಗಿ
ಕಾಡಿದ ನೆನಪುಗಳೆಷ್ಟೋ ಗೆಳತಿ,
ಒಮ್ಮೆ ಸಿಹಿಯಾಗಿ ಮತ್ತೆ ಕಹಿಯಾಗಿ
ಜಾರಿ ಹೋದ ಕಣ್ಣೀರಿಗೆ ಲೆಕ್ಕವಿಲ್ಲಾ ಸಖೀ...

ಬದುಕು ಇಲ್ಲಿ ಚಲಿಸುವ ಮೋಡ
ನೆನಪುಗಳ ಮಳೆ ಮಿಂಚುಗಳ ಜೊತೆ,
ಕೊಚ್ಚಿ ಹೋಗಲೂಬಹುದು ಮನಸು
ನೆನಪುಗಳ ಅತಿವೃಷ್ಟಿಯಲಿ...

25 November, 2018

ಪಯಣ...

ನೀರ ಮೇಲಿನ ಗುಳ್ಳೆ
ಬದುಕು ಇಲ್ಲಿ ಮನಸೇ,
ನಾಳೆಯೆಂಬ ಬಿಸಿಲ ಕುದುರೆ
ಏರೋ ಚಿಂತೆ ಇಂದು ಏಕೆ...

ನಾಳೆ ನಿನ್ನದಲ್ಲಾ
ಎಂಬ ಚಿಂತೆ ಯಾಕೆ,
ಇಂದು ಕೈಯಲಿರುವಾಗ
ಖುಷಿಯಿಂದ ಬಾಳಬೇಕು ಇಲ್ಲಿ...

ಬದುಕೋ ಭೂಮಿ ಕೂಡ
ಗುಂಡಗೆ ತಿರುಗುತಿಹುದು ಇಲ್ಲಿ,
ನೋವು ನಲಿವು ಎಲ್ಲಾ
ಮತ್ತೆ ಮತ್ತೆ ಬರುವುದಿಲ್ಲಿ...

ಕಳೆದು ಹೋದ ಕಾಲ
ಮತ್ತೆ ಬರದು ಎಂಬುದೊಂದು ಸತ್ಯ,
ಆದರೆ ಕಳೆದುಕೊಂಡ ನಗುವಾ
ತಿರುಗಿ ಪಡೆಯಬಹುದು ಇಲ್ಲಿ...

ನೋವಿಗೆ ಕಾರಣ ನೂರು
ನಗುವಿಗೆ ಕಾರಣ ಬೇಕಿಲ್ಲಾ,
ಬದುಕಿನ ಪಯಣ ಮೂರು ದಿನ
ನಗುವಿರಲಿ ಅಲ್ಲಿ ಪ್ರತಿದಿನ...





15 November, 2018

ಅವಳು...

ನಾನು ಮೆಚ್ಚಿದ ಮೊದಲ ನಗುವು
ಮನಸು ಮೆಚ್ಚಿದ ತೊದಲ ನುಡಿಯು,
ಪ್ರೀತಿ ಕಲಿಸಿದಾ ಮೊದಲ ಹೆಣ್ಣು
ಬದುಕು ಬಯಸಿದಾ ಮೊದಲ ಕನಸು...

ಬದುಕು ಹರಸಿದ ಮೊದಲ ಗೆಳತಿ
ಮನಸ ಹರಸಿದ ಮೊದಲ ಪ್ರೀತಿ,
ಭಾವಗಳಿಗೆ  ರೆಕ್ಕೆ ಕಟ್ಟಿದಾಕಿ
ಮೊದಲು ಮೂಡಿದಾ ಒಲುಮೆಯ ರೀತಿ...

ಅವಳೊಂದು ನಗುವ ಬುಗ್ಗೆ
ಬದುಕಲಿ ಭರವಸೆಯ ಚಿಲುಮೆ,
ಕೋಪವಿರದ ಮನಸು ಅವಳದು
ನೋವಲೂ ನಗುವ ಗುಣದವಳಾಕೆ...

ನನ್ನೊಳಗಿನ ಕವಿತೆಯೀಕೆ
ಕನಸಿಗೆ ಎಂದೂ ಸ್ಫೂರ್ತಿಯವಳು,
ನನ್ನೊಳಗಿನ ಒಲವ ಮನಸೇ
ಗಂಡಿನೊಳಗಿನ ಹೆಣ್ತನವೂ ನೀ...

02 November, 2018

ಅಂತರಂಗ...

ಒಳಗೊಳಗೆ ಅಳುವ ಮನಸೀಗೆ
ಯಾವ ಮದ್ದು ಇಲ್ವೆ ಭಗವಂತ,
ಕಾರಣ ಇಲ್ಲದೆ ಕಾಡೋ ನೋವಿಗೆ
ಕಾರಣ ಕೊಡಲಿ ನಾ ಏನಂತ...

ವರವೋ ಇದು ಶಾಪವೋ
ತಿಳಿಯಲಿ ನಾ ಹೇಗಂತ,
ಮನಸಿನ ಈ ಕಳವಳಕೆ
ಹೇಳಲೇ ನಾನು ಆತಂಕ...

ಮನಸಿನ ಗಾಯ ಮಾಗೋಕೆ
ನಗುವಿನ ಮುಲಾಮು ಹಚ್ಚಿದೆ,
ಒಳಗಿನ ನೋವು ಹೆಚ್ಚಾಗಿರೆ
ನಗುವಿನ ಲೇಪವೂ ಕರಗಿದೆ...

ಹೃದಯದ ಗಾಯ ಮಾಸೋಕೆ
ಔಷಧಿ ಯಾವುದು ಹೇಳಪ್ಪ,
ಕಾಯಿಲೆಯಿಲ್ಲದೆ ಜೀವ ನರಳುತಿರೆ
ಬದುಕಿಸೊ ಮದ್ದು ಯಾವುದು ಭಗವಂತ...

28 October, 2018

ರಾಕ್ಷಸ...

ಕಣ್ಣ ಹನಿಗಳು ಬತ್ತಿ ಹೋಗಿವೆ
ಹೃದಯವೇ ನಿನ್ನ ಕೂಗಿಗೆ,
ರಕ್ತವು ಕೂಡ ಆವಿಯಾಗಿದೆ
ಮನಸೇ ನಿನ್ನ ಕುದಿಯುವಿಕೆಗೆ...

ಜೀವನ ನಡೆದಿದೆ ತಣ್ಣಗೆ
ಓ ವಿಧಿಯೇ ನಿನ್ನಯ ಆಟದಲಿ,
ಸಾವು ಕೂಡ ಮುಗುಳುನಗೆ ಬೀರಿದೆ
ಬದುಕೇ ನಿನ್ನ ಸಾಹಸಕೆ...

ಒಲವೇ ನೀನಿಲ್ಲಿ ಸುಮ್ಮನೆ
ಈ ಒಂಟಿ ಪಯಣದಲಿ,
ಸತ್ಯ ಧರ್ಮದಾ ಬೆಳಕಿಲ್ಲಾ
ಬೆತ್ತಲೆಯಾ ಜಗದೊಳಗೆ...

ನಾಳೆಗಳೊಳಗೆ ನಾನಿಲ್ಲಾ
ಕೇಳಿರಿ ಓ ಕನಸುಗಳೇ,
ಸಾವೆಂಬ ಸೂತಕದ ಭಯವೂ ಕಾಡಿಲ್ಲ
ಮನಸಿಲ್ಲಿ ಸತ್ಯಕ್ಕೆ ಹತ್ತಿರ ಇರೋವಾಗ...

ಕಣ್ಣೀರಿನ್ನೂ ಉಕ್ಕಲ್ಲಾ
ಬದುಕಿನ ಒಂಟಿ ಪಯಣದಲಿ,
ಕ್ಷಮಿಸೂ ಒಲವೇ ಮನಸಿಲ್ಲಿ ಕೆರಳಿದರೆ
ನಾನಿಲ್ಲಿ ನರ ರಾಕ್ಷಸ...

14 October, 2018

ಗುಬ್ಬಿ ಗೂಡು...

ಗುಬ್ಬಚ್ಚಿ ಗೂಡು ಮನಸಿಲ್ಲಿ
ಓ ಪ್ರೀತಿ ನಿನ್ನ ಕನವರಿಕೇಲಿ,
ಕನಸಿನ ಮಾತು ಹೆಚ್ಚಾಯ್ತು
ನೂರು ಹಾಳು ನೆನಪಲ್ಲಿ...

ಚಿಟಪಟ ಕೂಗೋ ಮನಸಿಲ್ಲಿ
ಭಾವದ ರೆಕ್ಕೆ ಬಿಚ್ಚಿದೆ,
ಬದುಕಿನ ಅಂಗಳದ ತುಂಬೆಲ್ಲಾ
ಕನಸಿನ ಕಾಳು ಹೆಕ್ಕುತಿದೆ..

ಚಿಲಿಪಿಲಿ ಸದ್ದನು ಮಾಡುತ್ತಾ
ಮನಸಿನ ಗುಬ್ಬಿ ಹೊರಟಾಯ್ತು,
ಪ್ರೀತಿಯ ಸವಿನೆನಪಲ್ಲಿ
ಗೂಡನು ಬಿಟ್ಟು ಆಗಸ ಸೇರಾಯ್ತು...

ಪ್ರೀತಿಯ ಕನವರಿಕೇಲಿ
ಗುಬ್ಬಿಗೂಡು ಈಗ ಪ್ರೇಮಲೋಕ,
ಕನವರಿಸೋ ಹೃದಯಕ್ಕೆ
ಪ್ರೀತಿಯೇ ಇಲ್ಲಿ ಜಗವೀಗ...

07 October, 2018

ಓ ಕನಸುಗಳೇ...

ವಾಮನ ನಾನು ಓ ಕನಸುಗಳೇ
ತ್ರಿವಿಕ್ರಮರಾಗದಿರಿ ನೀವಿಲ್ಲಿ,
ಮನಸಿನ ಮಾತು ಹೃದಯವ ಸೇರುವ ಮುನ್ನ
ಒಮ್ಮೆ ನಿಂತು ಕೇಳಿ ನೀವಿಲ್ಲಿ...

ಮನಸಿಂದ ಮನಸೊಳಗೇ ಜನಿಸಿದರೂ
ಹಾರಿ ಹೋಗದಿರಿ ಆಗಸಕೆ,
ಹೃದಯವ ತಲುಪುವ ಮುನ್ನ ಜಾರದಿರಿ
ಅಕ್ರಮವಾದೀತು ಓ ಕನಸುಗಳೇ...

ಬದುಕಿನ ಬುತ್ತಿಯ ಒಳಗೆ
ನೀವಿಲ್ಲಿ ಪ್ರೀತಿಯ ತುತ್ತುಗಳು,
ಬದುಕಿನ ಮುನ್ನುಡಿ ನೀವೇ
ಕರಗದಿರಿ ನಂದಾದೀಪವಾಗುವ ಮುನ್ನ...

ಮನಸಿನ ಮಾತು ನೀವು
ಹೃದಯದ ದನಿಗೆ ಕಿವಿಯಾಗಿ,
ಮನಸಿನ ಕದವ ತೆರೆಯೋ ಮುಂಚೆ
ಹೃದಯದ ಮಿಡಿತಕೆ ತಲೆಬಾಗಿ...

30 September, 2018

ಉತ್ತರಿಸು ನೀ ಓ ಬ್ರಹ್ಮ...

ಹಣೆಬರಹ ಬರೆದ ಓ ಬ್ರಹ್ಮ
ನಿನಗಿಲ್ಲಿದೆ ನೂರು ಪ್ರಶ್ನೆಗಳು,
ಉತ್ತರಬೇಕಿದೆ ನಿನ್ನಿಂದ
ಬದುಕಲಿ ಯಾಕೆ ಬರೆದೆ ಗೋಜಲುಗಳನ್ನು...

ಪ್ರೀತಿಯ ಬರೆದೆ ನೀ ಬದುಕಲ್ಲಿ
ಸಂಶಯವಾ ಯಾಕೆ ಹುಟ್ಟಿಸಿದೆ,
ಸಂಬಂಧಗಳ ಇಲ್ಲಿ ಜೋಡಿಸಿದೆ
ಅಸೂಯೆಯಾ ಯಾಕೆ ನೀ ಕರುಣಿಸಿದೆ...

ನಂಬಿಕೆಯನು ನೀನಿಲ್ಲಿ ಬರೆದಿಟ್ಟೆ
ಅಪನಂಬಿಕೆಗೇಕೆ ಇಲ್ಲಿ ಜಾಗವ ಕೊಟ್ಟೆ,
ಆಸೆಗಳನ್ನೆನೋ ಕರುಣಿಸಿದೆ
ವಾಮಮಾರ್ಗಗಳನ್ನೇಕೆ ಪರಿಚಯಿಸಿದೆ...

ಸ್ನೇಹವ ಬರೆದಾ ಓ ಬ್ರಹ್ಮ
ಹಿತ ಶತ್ರುಗಳನ್ನೇಕೆ ಹುಟ್ಟಿಸಿದೇ,
ಮಿಡಿಯುವ ಮನಸ ನೀ ಕೊಟ್ಟೆ
ಪರರಿಗೆ ಆಡಲು ಜಾಗ ಯಾಕೆ ಬಿಟ್ಟೆ...

ಸೃಷ್ಟಿಯನೇನೋ ಮಾಡಿಬಿಟ್ಟೆ
ಮನಸಿನ ಮರೆಯಲಿ ಯಾಕೆ ನಿಂತುಬಿಟ್ಟೆ,
ಬದುಕಿನ ಗುರಿಯನು ಮರೆಸಿಬಿಟ್ಟು
ಮೋಕ್ಷದ ದಾರಿಯ ಯಾಕೆ ಬಚ್ಚಿಟ್ಟೆ...

21 September, 2018

ಜೀವನ ಚಕ್ರ....

ಮುದ್ದು ಮನಸೇ ಓ ಪೆದ್ದು ಮನಸೇ
ನಗುನಗುತಾ ನೀ ಸಾಗು ಮನಸೇ,
ಹುಟ್ಟಿನರಮನೆಯಿಂದ ಸಾವಿನ ಮೆರವಣಿಗೆವರೆಗೂ
ನಗುತಾ ಸಾಗಬೇಕು ನೀ ಹುಚ್ಚು ಮನಸೇ...

ನಿನ್ನೆ ಯಾರೋ ಇಂದು ಇನ್ಯಾರೋ
ನಾಳೆಯೆಂಬುದು ನೀನೇ ಆಗಿರಬಹುದು,
ಹುಟ್ಟು ಮಾತ್ರ ಸ್ವಂತ ಇಲ್ಲಿ
ಸಾವಿಗ್ಯಾರೂ ಹೊಣೆ ಇಲ್ಲಾ ಇಲ್ಲಿ...

ಹೋಗೊ ಮುಂಚೆ ಹೇಳೊರು ಇಲ್ಲಾ
ಹೋಗೊವಾಗ ತಡೆಯೋರು ಇಲ್ಲಾ,
ಇಂದು ಇಲ್ಲಿ ಎಲ್ಲಾರೂ ಜೊತೆಗಿರೆ
ನಗುನಗುತಾ ಕೂಡು ಮನಸೇ...

ಬದುಕಿನಲ್ಲಿ ಭವಣೆ ತಪ್ಪದೂ ಎಂದೂ
ಸಾವೆಂಬ ಸತ್ಯ ಸುಳ್ಳಾಗದಿಲ್ಲಿ,
ಜೀವನ ಚಕ್ರ ಸಾಗುತಿರಲು ಇಲ್ಲಿ
ಸಾವೆಂಬ ಮಿತ್ರ ಕರೆಯದೇ ಬರುವನಿಲ್ಲಿ...

ನಗುನಗುತಾ ಬಾಳಬೇಕು ಮನಸೇ ನೀನಿಲ್ಲಿ
ಜೀವನ ಸತ್ಯ ಕಹಿಯೂ ಎಂದೂ,
ನಗುವೇ ಶಕ್ತಿ ಈ ಬದುಕಿಗಿಲ್ಲಿ
ನೋವನು ಮರೆಸೋ ಶಾಂತಿಗೀತೆಯಿಲ್ಲಿ...

09 September, 2018

ಮರೀಚಿಕೆ...

ಬದುಕಿಲ್ಲಿ ಭರವಸೆಯು
ನಂಬಿಕೆಯ ನೆರಳಿರೋವರೆಗೂ,
ಕನಸಿಲ್ಲಿ ಜೀವಂತ
ಒಲವು ಹಸಿರಾಗಿರೋವರೆಗೂ...

ಭಯವಿಲ್ಲಿ ನೆರಳಾಗಿ ಕಾಡಲು
ನಂಬಿಕೆಯ ದೀಪವಾರುತಿದೆ,
ಆತ್ಮವಿಶ್ವಾಸದ ಪರದೆ ಜಾರುತಿರೆ
ನಾಳೆಗಳು ಮರೀಚಿಕೆಯಾಗುತಿದೆ...

ಸಂಬಂಧಗಳ ಸಂಕೋಲೆಯಿಲ್ಲಿ
ಬಂಧಿಸುವ ಭೀತಿ ಎದುರಾಗಿರಲು,
ಸ್ವಚ್ಚಂದ ಮನಸಿನ ಬಾನು
ಕಾರ್ಮೋಡಗಳ ನೆಲೆಯಾಗಿದೆ...

ಕನಸುಗಳು ಕಾಲಗರ್ಭ ಸೇರುತಿರಲು
ಮನಸೊಳಗೆ ಅಂಧಕಾರ,
ಭೂತ ಭವಿಷ್ಯಗಳು ಕಾಡುತಿರಲು
ಬದುಕಿಲ್ಲಿ ಮರೀಚಿಕೆ...




30 August, 2018

ನೆನಪು...

ಖಾಲಿ ಖಾಲಿ ಮನಸೊಳಗೂ
ಪೋಲಿ ಪೋಲಿ ಕನಸುಗಳು,
ಕಣ್ಣ ಮುಚ್ಚಲು ಬಿಡದಂತೆ
ಕಾಡಿ ಓಡಿ ಹೋಗುತಿವೆ...

ಬರಿ ರಾತ್ರಿಯಲ್ಲ ಹಗಲೊಳಗೂ
ಗೆಜ್ಜೆ ಕಟ್ಟಿ ಕುಣಿಯುತಿವೆ,
ಧ್ಯಾನವೀಗ ಮರೆತೋಯ್ತು
ಮನಸಿನ ಮಾತು ಕೂಡ ನಿಂತೋಯ್ತು...

ಓಡಿ ಹೋಗೊ ಕಾಲಕ್ಕೂ
ಕರುಣೆಯೆ ಇಲ್ಲಿ ಕರಗೋಯ್ತು,
ಕೂಗಿ ಕರೆದರೂ ಇಲ್ಲೀಗ
ಕಾಡುವ ನೆನಪುಗಳನ್ಯಾರೂ ತಡೆಯೋರಿಲ್ಲಾ...

ಪ್ರೀತಿಯ ಕೇಳಲು ನಾ ಬಂದೆ
ವಿರಹದ ಉರಿಯಾ ನೀ ಕೊಟ್ಟೆ,
ಕಾಡುವ ಓ ನೆನಪುಗಳೇ
ನಿಮಗೆ ರಜೆಯೂ ಕೂಡ ಇಲ್ಲಿಲ್ವೇ?...

15 August, 2018

ನಮೋ ತಾಯಿ ಭಾರತಿ...

ತನು ಕನ್ನಡ ಮನ ಕನ್ನಡ
ರಕ್ತದ ಕಣ ಕಣವು ಕನ್ನಡ,
ದೇಹದೊಳಗಣ ಉಸಿರು ಮಾತ್ರ
ತಾಯಿ ಭಾರತಿ ನಿನಗರ್ಪಿತ...

ತಾಯಿ ನೀನು ದೈವವಾದೆ
ಓ ಪ್ರೀತಿಯ ಭಾರತಿ,
ನಿನ್ನ ಮಡಿಲಲ್ಲಿ ಜ್ಯೋತಿಯಾಗಿ
ನಿನಗೆ ಬೆಳಗುವೆನಮ್ಮ ಆರತಿ...

ಕೋಟಿ ದೇವರಿಲ್ಲಿ ಇದ್ದರೂನು
ನೀನವರಿಗಿಲ್ಲಿ ಮಾತೆಯೂ,
ದಿನದ ಮೊದಲ ನಮನ
ನಿನಗೆ ಓ ದೇವಿ ಭಾರತಿ...

ನಿತ್ಯ ನಡೆಯುವುದಿಲ್ಲಿ ಪೂಜೆ ನಿನಗೆ
ಮಂತ್ರವದುವೆ ವಂದೇಮಾತರಂ,
ಹಿಮದ ಗಿರಿಯು ಕಿರೀಟ ನಿನಗೆ
ನಮ್ಮ ಕಾಯಲದುವೆ ಕೋಟೆಯೂ...

ಗಂಗೆ ಯಮುನೆ ತುಂಗ ಭದ್ರೆ
ನಿನಗೆ ನಿತ್ಯ ಅಭಿಷೇಕವಗೈವರು,
ಮಲೀನವಾದ ಹೃದಯಗಳಲಿ
ದೇಶ ಭಕ್ತಿಯನ್ನು ತುಂಬಿಸಮ್ಮ ಭಾರತಿ...

12 August, 2018

ಅಪ್ಪಾ...


ಬದುಕು ಕಲಿಸಿದ ಕಲಾವಿದ
ಜೀವನದ ನಿಜವಾದ ನಾಯಕ,
ಬದುಕಲಿ ಪಡೆದ ಮೊದಲ ಸ್ನೇಹಿತ
ನನ್ನ ಕನಸುಗಳ ಚೌಕಿದಾರ...

ಪ್ರೀತಿಲಿ ನೀನು ಹೃದಯವಂತ
ತಪ್ಪಿಗೆ ನೀನೇ ದಂಡನಾಯಕ,
ನೋವಲ್ಲೂ ನಗುವ ಧೀಮಂತ
ಕಣ್ಣೀರನೂ ಕರಗಿಸೋ ಜಾದುಗಾರ...

ಸ್ವಾರ್ಥವ ಮರೆತ ಗುಣವಂತ
ಸ್ವಾಭಿಮಾನವ ಮೆರೆವ ಶ್ರೀಮಂತ,
ನ್ಯಾಯಕ್ಕೆ ನೀನೇ ಅರಕ್ಷಕ
ಅಗಣಿತ ಗುಣಗಳ ಸಾಗರ...

ನೀನು ಸೃಷ್ಟಿಯ ಸುಂದರ ಕೌತುಕ
ನೀನು ಆ ದೇವರಾ ಮಗ,
ಸವೆಸುವೆ ಜೀವವ ಸಂಬಂಧಗಳಿಗಾಗೆ
ಆದರೂ ನೀನು ಶಾಪಗ್ರಸ್ಥ ಗಂಧರ್ವ...


05 August, 2018

ಆತ್ಮ ಬಂಧ...

ಜೊತೆಗೆ ಇರುವವರೆಗೆ ನೀನು
ಕಾರಣ ಕೇಳಲಿಲ್ಲಾ ನಾನು,
ಬಿಟ್ಟು ಹೋಗುವ ಮುಂಚೆ
ಕಾರಣ ಕೇಳೆನು ನಾನು...

ಇಂದಲ್ಲಾ ನಾಳೆ ನೀನು
ಬಿಟ್ಟು ಹೋಗಲೇಬೇಕು ನನ್ನ,
ಕಾರಣ ತಿಳಿದಿದೆ ನನಗೆ
ಮತ್ತೆ ಹೇಗೆ ತಡೆಯಲಿ ನಿನ್ನಾ...

ಬೇಸರವು ನನಗಿಲ್ಲಾ
ನೀ ಬಿಟ್ಟು ಹೋಗುವೆಯೆಂದೂ,
ನಮ್ಮಿಬ್ಬರ ಅಗಲುವಿಕೆ
ಅನಿವಾರ್ಯ ಈ ಜೀವನಚಕ್ರದಲ್ಲಿ...

ಜೊತೆಗಿರುವವರೆಗೂ ನೀನಾದೆ ಉಸಿರು
ನಾನಾದೆ ನಿನಗಿಲ್ಲಿ ಹೆಸರು,
ನೀನಿಲ್ಲದ ಮೇಲೆ ಲೋಕವೇ ಬರಿದು
ನಾನಾಗುವೆ ಪಂಚಭೂತಗಳ ಶರಣು...

25 July, 2018

ಫಕೀರ...

ಬದುಕೆಂಬ ಬೃಂದಾವನದಲ್ಲಿ
ನಾನು ಒಬ್ಬ ಫಕೀರ,
ನೋವು ನಲಿವುಗಳೆಷ್ಟೇ ಇರಲಿ
ನಗುವೊಂದೇ ಅದಕ್ಕೆ ಪರಿಹಾರ...

ಹಂಗೇನೂ ಇಲ್ಲಾ ಇಲ್ಲಿ
ಸಂಬಂಧಗಳ ಸುಳಿಯೊಳಗೆ,
ಸ್ನೇಹಾನೇ ಎಲ್ಲಾ ಇಲ್ಲಿ
ಈ ಫಕೀರನ ಮನದ ಜೋಳಿಗೆಯೊಳಗೆ...

ಅಹಂಕಾರವು ಚಪ್ಪಲಿ ಇವಗೆ
ಈ ಜಗದ ಸುತ್ತಾಟಕ್ಕೆ,
ಧರ್ಮವೇ ಕಿರೀಟವು ಇಲ್ಲಿ
ಇವ ನುಡಿಯೋ ನ್ಯಾಯಕ್ಕೆ...

ನಂಬಿಕೆಯೇ ಮೂಲಮಂತ್ರ
ಬದುಕಿನಾ ಈ ಬೃಂದಾವನದಿ,
ಪ್ರೀತಿನೇ ಅಮೃತ ಇಲ್ಲಿ
ಪ್ರತಿ ನೋವನು ಗುಣಪಡಿಸೋಕೆ...

ಸಹನೆಯೇ ಯಜ್ಞ ಇಲ್ಲಿ
ಕೋಪ ತಾಪಗಳ ಭಸ್ಮ ಮಾಡೋಕೆ,
ಭರವಸೆಯಾ ನಾಳೆಯೊಳಗೂ
ಪ್ರೀತಿ ಹುಡುಕುವ ನಾನು ಒಬ್ಬ ಫಕೀರ...






15 July, 2018

ಬಯಲುದಾರಿ...

ಬದುಕಿನ ಬಯಲೊಳು
ಬೆತ್ತಲಾಗಬೇಡವೆ ಮನಸೇ,
ಸಿಹಿಯಾದರೆ ನೀನು ನುಂಗಿ ಬಿಟ್ಟಾರು
ಕಹಿಯಾದರೆ ನಿನ್ನ ಉಗುಳಿಯಾರು...

ಮನಸಿನ ಆಗಸದಿ
ಕನಸನು ತೆರೆದಿಡಬೇಡವೇ ಬದುಕೇ,
ಕಣ್ಣ್ ದೃಷ್ಟಿಯಾದೀತು ಕನಸೀಗೆ
ಕರಗಿ ಹೋದಾವು ನಾಳೆಗಳ ಖುಷಿಯೂ...

ಮುಖವಾಡಗಳ ಬದುಕೇ
ಬಣ್ಣಗಳ ಹಚ್ಚದಿರು ನೀನು,
ನಾಟಕವಾದೀತು ಬದುಕು
ಜಗದ ನಾಟಕ ಶಾಲೆಯಲಿ...

ಉರಿವ ಜ್ವಾಲೆಯಾದರೂ ಬದುಕು
ಸುಡುವ ಕೆಂಡವಾಗಬೇಡ ಮನವೇ,
ಬೂದಿಯಾದರೂ ಸರಿಯೇ
ಫಲವತ್ತಾಗಿರಲಿ ನೀ ನಡೆದ ಹಾದಿ...












08 July, 2018

ಹೋಗಿಬಿಡು ಕತ್ತಲೆಯೇ...

ನಗುವಾ ಗುಲಾಬಿ ನಾನು
ನಗುವೇ ಬದುಕು ನನ್ನದೂ,
ನಗುವ ಕಸಿಯೋಕು ಮೊದಲು
ಈ ಮುಳ್ಳುಗಳ ರುಚಿಯನು ನೋಡು...

ಪ್ರೀತಿಯೇ ಬದುಕು ನನ್ನದೂ
ಪ್ರೀತಿಯಲಿ ನಾ ಪ್ರೇಮಾಚಾರಿ,
ಮೋಸದಲಿ ಮನಸ ಗೆಲ್ಲಲಾರೆ
ನೀನಾದರೂ ವಾಮಾಚಾರಿ...

ನಂಬಿಕೆಯೇ ಬದುಕೂ ನನ್ನದು
ನನಗದುವೇ ಅಮೃತವೂ,
ಬೆರೆಸಲಾರೆ ನೀ ವಿಷವಾ
ಸಂಬಂಧಗಳ ಈ ಪಾತ್ರೆಯೊಳಗೆ...

ಧರ್ಮವೇ ಉಸಿರೂ ನನಗೇ
ಸತ್ಯವೇ ನಾ ನಡೆವ ಹಾದಿ,
ಕೆಣಕಿ  ಬಲಿಯಾಗುವೆಯೇತಕೆ
ಸಾಮ ಧಾನ ದಂಡ ಭೇದಕೆ...

ಬದುಕಿದು ಆ ಶಕ್ತಿಯ ಕೊಡುಗೆ
ನಾ ಕೋಟಿ ಹರಕೆಯಾ ಫಲ,
ಮಣಿಸಲಾರೆ ಓ ಕ್ಷುದ್ರಶಕ್ತಿಯೇ ನೀ
ಸತ್ಯದಾ ಬೆಳಕಿರುವವರೆಗೇ...



29 June, 2018

ಸಂತೆ...

ಚಿಂತೆಯಾ ಸಂತೆಯಲ್ಲಿ
ನಾನು ಒಬ್ಬ ಭಿಕಾರಿ,
ಕನವರಿಸೋ ಕನಸುಗಳು ಕೂಡ
ಇಲ್ಲಿ ಕೈಗೆಟುಕದಷ್ಟು ದುಬಾರಿ...

ಮನಸ್ಸಾಗಿದೆಯಿಲ್ಲಿ ಮಾರುಕಟ್ಟೆ
ನಡೆದಿದೆ ಭಾವನೆಗಳ ವ್ಯಾಪಾರ,
ಬಿಕರಿಯಾಗಿವೆ ಸಂಬಂಧಗಳು
ಜೋರಾಗಿದೆ ಸ್ವಾರ್ಥದ ವ್ಯಾಪಾರ...

ಬದುಕಿನಾ ದಾರಿಯ ತುಂಬಾ
ಬರೀಯ ಬಿರುಗಾಳಿ,
ನಾಳೆಯ ನೋಡಲು ಹೋದರೆ
ಕಣ್ಣಿನ ತುಂಬಾ ಬರೀ ಧೂಳುರೀ...

ಮನಸಿನ ತುಂಬಾ ಇಲ್ಲಿ
ಮಾಗದ ಗಾಯನೇ,
ಮೂಗು ಮುಚ್ಚಿದರೂ ಕೂಡ
ನಿಲ್ಲುತ್ತಿಲ್ಲ ಕಮಟು ವಾಸನೆ...

ಉರಿದು ಹೋಗುತಿದೆಯಿಲ್ಲಿ
ಬದುಕಿನಾ ಮೋಹ,
ಅಡಿಗಡಿಗೆ ಗೋಚರಿಸಿದೆ
ಕಾಲನ ಪಾಷ...








12 June, 2018

ತವಕ...

ಮೂರು ದಿನದ ಬದುಕೂ
ಇಲ್ಲಿ ನೂರು ಖುಷಿಯ ತವಕ,
ಕಣ್ಣರೆಪ್ಪೆ ಮುಚ್ಚಿ ತೆರೆಯೋ ಮುಂಚೆ
ಕನಸ ಮುಗಿಸೋ ತವಕ...

ಜಗದ ಕತ್ತಲು ಕಳೆಯೋ ಮುಂಚೆ
ಬೆಳಕ ಕಾಣೋ ತವಕ,
ಮಿಂಚು ಹುಳದ ಬೆಳಕಿನಲ್ಲೂ
ಲೋಕ ಸುತ್ತುವ ತವಕ...

ಒಂಟಿ ಪಯಣದಲ್ಲೂ
ಜಂಟಿ ಕನಸ ಕಾಣೋ ತವಕ,
ಕತ್ತಲು ಕವಿದ ಬದುಕಿನಲ್ಲೂ
ಬೆಳದಿಂಗಳ ಹುಡುಕೋ ತವಕ...

ಸೂರ್ಯ ಕಿರಣದೊಳಗೂ
ಚಂದ್ರ ಬಿಂಬ ಕಾಣೋ ತವಕ,
ಭಾವ ಮುದುಡಿದ ಮನಸಿನಲ್ಲೂ
ಪ್ರೀತಿ ಬೆಳೆಸೋ ತವಕ...

09 June, 2018

ಮನ್ವಂತರ...

ಎದೆಯ ತುಂಬೆಲ್ಲಾ ನೆನಪುಗಳ ಹಾವಳಿ
ಮನಸಿನಾ ತುಂಬಾ ಕನಸುಗಳಾ ಹಾವಳಿ,
ರಜೆ ಹಾಕಿದ ಕನಸುಗಳು ಮತ್ತೆ ಹಾಕಿವೆ ಹಾಜರಿ...

ಬದುಕಿನಾ ಪುಟದೊಳಗೆ ಭಾವನೆಗಳ ಹಾಜರಿ
ಬರೆದಿದೆ ಮನಸೊಳಗೆ ನಲಿವಿನಾ ಚಿತ್ತಾರ,
ಚಿಂತೆಯೆಂಬ ಚಿತೆಯಿಲ್ಲಿ ಹಾಕಿದೆ ಗೈರು ಹಾಜರಿ...

ಮರಳಿದೆ ಮಂದಹಾಸ ಮನಸಿನಾ ಅಂಗಳಕೆ
ನಗುವಿನಾ ಪಯಣ ಈಗ ಬದುಕಿನಾ ನಂದನದೀ,
ಬದುಕೀಗ ತುಂಟಾಟ ತುಟಿಯಂಚಿನ ನಗುವಲ್ಲೇ...

ಕನಸುಗಳಿಗೆ ಶುರುವೀಗ ವಸಂತ ಕಾಲ
ನೋವು ನಲಿವುಗಳು ನೆಪವಷ್ಟೆ ನೆನಪೀಗೆ,
ಕನಸುಗಳ ಜೊತೆಯಿರಲು ಬದುಕಿಲ್ಲಿ ಚೈತ್ರ ಕಾಲ...